Лукашэнка прымушае сілавікоў супрацьстаяць сусветнаму фінансаваму крызісу

Аляксандр Лукашэнка лічыць, што сусветны фінансавы крызіс у вызначанай ступені можа закрануць інтэрасы краіны, заклікаючы сілавыя структуры супрацьстаяць гэтаму.

"Магчыма, гэта (крызіс - ІФ) закране і нас, магчыма, мы сутыкнемся з праблемамі экспарту. Наша задача ў чарговы раз выстаяць нягледзячы ні на што", - заявіў А.Лукашэнка, наведваючы Камітэт дзяржаўнай бяспекі, перадае «Інтэрфакс».

"На гэтым (на крызісе - ІФ) будуць спрабаваць дэстабілізаваць становішча", - сказаў кіраўнік беларускай дзяржавы.

Кажучы аб эканамічных працэсах, што адбываюцца ў свеце, ён заўважыў: "Хто меў рацыю - Лукашэнка, які заяўляў аб абароне нацыянальнай эканомікі, арыентацыі на нармальную эканамічную мадэль, або тыя дзеячы, якія называлі сябе рыначнікамі?". Па словах Лукашэнкі, "сёння за капейкі ў свеце можна купіць добрае прадпрыемства". "Думаю, яны (на Захадзе - ІФ) будуць гэтыя прадпрыемствы трымаць у руках дзяржавы, як трымаем мы іх заўсёды", - адзначыў ён. "Вось адказ гэтай свядомай інтэлігенцыі", - заўважыў А.Лукашэнка.

Па ягоных словах, "грошай з паветра не заробіш. Для гэтага трэба карачыцца". "Заклалі (ЗША) 700 млрд даляраў (для падтрымкі фінансавага рынка - ІФ), але ніхто не паверыў. Пустых зялёных грошай у свеце звышдастаткова, цяпер дадалі яшчэ 700 млрд", - сказаў прэзідэнт Беларусі.

Спасылаючыся на адзнакі расейскіх экспертаў, ён заўважыў: "Дна гэтага крызісу не відаць".