Беларусы заклікаюць эўрапейскую супольнасьць супрацьстаяць будаўніцтву АЭС
2- 24.11.2008, 14:41
Аргкамітэт грамадзянскай ініцыятывы «Астравецкая атамная — гэта злачынства!» зьвярнуўся да усіх грамадзянаў Беларусі, органаў улады, эўрапэйскай супольнасьці, МАГАТЭ й СМІ з заявай, у якой заклікае супрацьстаяць будаўніцтву АЭС.
У заяве гаворыцца, што супольнікі аргкамітэту не падзяляюць плянаў будаўніцтва АЭС на тэрыторыі Нарачанска-Вілейскага запаведнага краю, бо лічаць, што гэта месца можа ператварыцца ў яшчэ адну «чарнобыльскую дзірку» на мапе Эўропы, перадае «Радыё Свабода».
«АЭС можа быць пабудавана ў самай сэйсьмічнай зоне нашай краіны, паколькі менавіта ў Астравецкім раёне ў 1999 годзе адбыўся землятрус» — гаворыцца ў заяве.
У ёй таксама адзначаецца, што «удаўніцтва АЭС у постчарнобыльскай Беларусі — ня проста памылка, а злачынны намер, які можа прывесьці да яшчэ большай бяды, што здарылася на нашай зямлі»
Супольнікі аргкамітэту заклікаюць усіх грамадзянаў Беларусі, каму неабыякавы лёс краіны, далучыцца да іхняй ініцыятывы й разам супрацьстаяць будаўніцтву АЭС.
У склад аргкамітэту ўваходзяць сем чалавек: вэтэраны Вялікай Айчыннай вайны, працы, а таксама адзін рабочы й адзін індывідуальны прадпрымальнік.
Гэтым разам пад заявай падпісаўся й грамадзянін Нямеччыны, лекар, які нарадзіўся ў Астраўцы, але зараз жыве й працуе ў горадзе Дуйзбургу.
Нагадаем, некалькі тыдняў таму супольнікі аргкамітэту грамадзянскай ініцыятывы падавалі ў райвыканкам заяву на правядзеньне пікетаў супраць будаўніцтва АЭС у Астравецкім раёне. Калі ім адмовілі, яны зьвярнуліся з адпаведнай заявай у суд.
