Імпарт загадана знішчыць на нішто: забараняецца ўвоз прадуктаў і прамтавараў (Дакумент)

Урад Беларусі пачаў новы «крыжовы паход» на імпартныя тавары. З магазінаў можа знікнуць шмат чаго: імпартныя піва, шакалад, сыры, адзеньне, тэхніка, мэбля.

Міністэрства гандлю падрыхтавала пералік імпартных тавараў, знікненне якіх, на думку чыноўнікаў, «не акажа прыкметнага ўплыву на спажывецкі рынак краіны». У яго ўвайшлі 16 відаў харчовых і 15 пазіцый нехарчовых тавараў, паведамляюць «Беларускія навіны».

З прадуктаў харчавання ў «чорны спіс» патрапілі, у прыватнасці, імпартныя піва, безалкагольныя напоі, шакалад, маянэз, сыры, тварог, марозіва, хлеб і мучныя кандытарскія вырабы. З нехарчовых тавараў — замежныя тэлевізары, ровары, дываны, мэбля, торбы, майкі, сухія будаўнічыя сумесі і шэраг іншых.

Як вынікае з пратаколу аператыўнай нарады, якая прайшла ў Мінгандлі ў сярэдзіне лістапада, зменшыць аб'ёмы імпартных закупаў гэтых тавараў на палову плануецца ўжо ў лістападзе-снежні 2008 года.

Кіраўнікам упраўленняў гандлю аблвыканкамаў і Менскага гарвыканкама, а таксама аптовым арганізацыям быў дадзены і шэраг іншых даручэнняў. У прыватнасці, перагледзець дамовы арэнды складскіх памяшканняў з кампаніямі, якія ўвозяць «неабгрунтаваны імпарт». У выпадку, калі на плошчах, якія арандуюцца, захоўваюцца тавары, «імпарт якіх не аказвае прыкметнага ўплыву на спажывецкі рынак», будзе пастаўленае пытанне аб мэтазгоднасці дзеяння такіх дамоваў. А іншымі словамі — дамовы будуць скасаваныя.

Акрамя таго, на імпартныя тавары, якія трапілі ў «чорны спіс», прапаноўваецца ўвесці растэрміноўку па плацяжах на 180 дзён, што, па сутнасці, зробіць пастаўку тавараў у Беларусь непрывабнай для замежных кампаніяў.

«Замежныя вытворцы на гэта адназначна не пойдуць. Наўрадці хтосьці пагодзіцца чакаць паўгады, пакуль беларускі імпарцёр разлічыцца за пастаўленую прадукцыю. Такіх растэрміновак і ў лепшыя часы нам ніхто не даваў», — сказалі «Беларускім навінам» у адной з беларускіх фірмаў-імпарцёраў.

Там адзначылі, што сёння імпарцёры атрымліваюць тавары па перадаплаце альбо з невялікай адтэрміноўкай, на адзін-два тыдні, на працягу якіх можна было б прывезці ў краіну тавар, размытніць яго, завезці на склад і набыць валюту. Выйсце, вядома, можна знайсці праз пасярэднікаў, якія будуць за грошы выкупляць пастаўлены ў краіну тавар і прадаваць яго імпарцёру, але ўжо па больш высокім кошце.

На месцы спускаюцца ўказанні прыняць дадатковыя меры па скарачэнні імпарту тавараў і паслугаў. Так, Віцебскі гарвыканкам 20 лістапада накіраваў прадпрыемствам лісты з патрабаваннем скараціць імпарт «да мінімуму, аж да спынення спажывецкага некрытычнага імпарту». Чыноўнікі спасылаюцца на рашэнне свайго аблвыканкама «Аб мерах па мінімізацыі негатыўнага ўплыву сусветнага фінансавага крызісу на сацыяльна-эканамічнае развіццё Віцебскай вобласці», а таксама на тое, што трэба дакладна выконваць усе прагнозныя паказчыкі развіцця горада.

У пагоні за выкананнем плану любыя сродкі добрыя. Нагадаем, што не так даўно прыватным кампаніям, якія займаюцца імпартам, у адміністрацыйным парадку навязваліся заданні па экспарце тавараў: у памеры не менш за 25% ад аб'ёму імпартных паставак. Праўда, гэтае ноў-хаў некаторых раённых адміністрацыяў сталіцы ў жыццё не ўвасобілася.

Цікава, што яшчэ нядаўна чыноўнікі казалі аб тым, што невялікая доля спажывецкіх тавараў увогуле аб'ёме імпарту (не больш за 11%) не можа сур'ёзна паўплываць на сітуацыю з адмоўным сальда знешняга гандлю.

Змаганне з імпартам пачатае пад шумок сусветнага фінансавага крызісу. Відавочна, гэтыя меры павінны захаваць каштоўную валюту ў краіне і разгрузіць склады з беларускімі аналагамі. Некаторыя беларускія тавары, імпартныя аналогі якіх апынуліся ў гэтым «чорным спісе», і раней дрэнна прадаваліся (ровары, мыла, тэлевізары, бытавыя гадзіны), папаўняючы складскія запасы. І малаверагодна, што гэтыя запасы будуць змяншацца зараз, калі ва ўмовах крызісу замежныя рынкі збыту звужаюцца.

«Калі сёння мы эканомім валюту і складана завезці імпарт, асабліва не крытычны, дык гэта на руку: мы сваё пакладзем на прылавак. Трэба рабіць усё тое, што мы можам самі зрабіць, унутры краіны», — заявіў Аляксандр Лукашэнка 25 лістапада на сустрэчы з актывам Віцебскай вобласці.

Зрэшты, уведзеная Нацбанкам забарона на набыццё валюты для авансавых плацяжоў па знешнегандлёвых кантрактах палохае далёка не ўсіх імпарцёраў.

«Нас турбуе нават не столькі праблема авансавых плацяжоў, колькі магчымасць у прынцыпе набыць у хуткім часе валюту для разліку з пастаўшчыком. Мы працуем не па перадаплаце, а з невялікай адтэрміноўкай. Каб разлічыцца за тавар, валюта ў любым выпадку будзе патрэбная. А каб яе набыць, прыйдзецца, не выключана, два-тры тыдні стаяць у чарзе на валютнай біржы», — сказалі «Беларускім навінам» у кампаніі, якая займаецца імпартам бытавой тэхнікі.

А вось крытычны імпарт, які ў краіне не вырабляецца (морапрадукты, кава, гарбата), будзе крэдытавацца ў поўным аб'ёме, запэўніваюць у Мінгандлі.

«Мы будзем жорстка кантраляваць сітуацыю на спажывецкім рынку, каб не дапусціць найменшых збояў у пастаўках тавараў», — сказаў 17 лістапада першы намеснік міністра гандлю Міхаіл Свянціцкі.

Паводле яго словаў, там, дзе можна абыходзіцца сваімі таварамі, там і будуць ужывацца пэўныя меры.

Расчышчаючы паліцы ад некрытычнага імпарту, Мінгандаль ставіць перад вытворцамі, мясцовымі ўпраўленнямі гандлю задачу напаўняць крамы «усёй без выключэння наменклатурай тавараў, якія вырабляюцца ў краіне». Для іх набыцця плануецца прасіць банкі аб вылучэнні аптовым арганізацыям у 2009 годзе крэдытных рэсурсаў.

Ну а ў астатнім лозунг «купляйце беларускае» усім у рукі.