Кадафі разбіў свой шацёр у рэзідэнцыі Лукашэнкі «Заслаўль» (Фота)
15- 3.11.2008, 11:43
Лідэр лівійскай рэвалюцыі Муамар Кадафі, які знаходзіцца з афіцыйным візітам у Беларусі, разбіў свой шацёр на тэрыторыі адной з дзяржаўных рэзідэнцый — «Заслаўль».
Аб гэтым «Салідарнасці» паведаміў Павел Лёгкі, прэс-сакратар Аляксандра Лукашэнкі.
Таксама суразмоўца распавёў аб планах Кадафі і Лукашэнкі на 3 лістапада.
— Адбудзецца сустрэча двух лідэраў у вузкім коле, потым — у пашыраным. Чакаецца падпісанне двухбаковых дамоваў. А увечары кіраўнік Беларусі зладзіць ў гонар візіту Муамара Кадафі афіцыйны прыём па адрасе Фрунзе, 15 (адна з рэзідэнцый Лукашэнкі), — падагульніў Павел Лёгкі.
Нагадаем, 1 лістапада лідэр лівійскай рэвалюцыі прыняў у сваім бедуінскім намёце, размешчаным на час візіту ў Расею ў Тайніцкім парку Крамля, прэм'ер-міністра Ўладзіміра Пуціна і французскай спявачку Мірэй Мацье (на фота).
Аб тым, каго ён плануе запрасіць у свой шацёр у “Заслаўлі”, не паведамляецца.
Кіраўнік Вялікай лівійскай рэвалюцыі Муамар Кадафі прыбыў 2 лістапада ў Менск з афіцыйным візітам. Гэта ягоны першы прыезд у Беларусь. Учора ў Нацыянальным аэрапарту Менск яго асабіста сустрэў Аляксандр Лукашэнка.
Кадафі будзе знаходзіцца з візітам у Беларусі 2-4 лістапада. Праграмай ягонага знаходжання запланаванае таксама наведванне Беларускага дзяржаўнага музея гісторыі Вялікай Айчыннай вайны, ускладанне вянка да манумента Перамогі ў Менску.
