У Мілінкевіча запатрабавалі дэклярацыю пра даходы

Дэпартамент фінансавых расследаванняў Камітэта дзяржаўнага кантролю па Гродзенскай вобласці (УДФР) запатрабаваў ад лідэра руху «За Свабоду» Аляксандра Мілінкевіча дэкларацыю аб даходах.

Фінансавыя звесткі аб даходах і маёмасці за 2005-2008 гады Аляксандр Мілінкевіч павінен падаць да 12 гадзін панядзелка 21 ліпеня. У выпадку, калі палітык не выканае патрабаванне, яму пагражае адміністрацыйная адказнасць.

Аляксандр Мілінкевіч адзначыў, што не мае сакрэтаў і абавязкова прадставіць усе неабходныя дакументы. Ён, аднак, лічыць, што гэтыя патрабаванні маюць выразны палітычны падтэкст і выказаў шкадаванне, што прафесіяналы фінансавага следства вымушаныя займацца палітычным вышукам і пераследам.

Нагадаем, што сёньня ціску фінансавай міліцыі падвяргаюцца сотні дэмакратычных актывістаў па ўсёй краіне. У Дэпартамент фінансавых расследаванняў і падаткавыя інспекцыі выклікалі лідэраў грамадзянскай кампаніі «Еўрапейская Беларусь» Андрэя Саньнікава і Зміцера Бандарэнку, лідэра Аб’яднанай грамадзянскай партыі Анатоля Лябедзьку, намесніка старшыні Партыі БНФ Вінцука Вячорку, лідэра Партыі камуністаў Беларускай Сяргея Калякіна, праваабаронцаў Алеся Бяляцкага, Валянціна Стэфановіча, Веру Страмкоўскую, старшыню Беларускага Хельсінкскага камітэта Алега Гулака, сябраў БХК Таццяну Процьку, Гары Паганяйлу, Зміцера Маркушэўскага, журналістку Ірыну Халіп, а таксама кандыдатаў на ўдзел у восеньскіх «парламенцкіх выбарах» ад дэмпартый і кандыдатаў у сябры выбарчых камісій.