Баранавіцкія прадпрымальнікі пратэставалі ля гарвыканкаму
2- 12.01.2009, 15:28
Сёньня а 12.00 у Баранавічах на плошчы Леніна перад будынкам гарвыканкаму адбылася акцыя прадпрымальнікаў, якія пратэстуюць супраць павелічэньня падаткаў і грашовай платы за арэнду гандлёвых месцаў.
У Баранавічах на плошчы Леніна сабралася каля трыццаці індывідуальных прадпрымальнікаў, перадае «Радыё Свабода». Ніякай рэакцыі з боку ўлады не было. Толькі адзін раз падыходзіў міліцыянт, і яшчэ два міліцыянты пільнуюць непадалёку.
Арганізатары ацэньваюць акцыю як спантанную.
«Увогуле, акцыя атрымалася крыху спантаннай, бо яна арганізоўвалася ў сьнежні, калі быў напал жарсьцяў. Яшчэ замінае адзін нюанс. Навучаныя горкім досьведам перасьледу, людзі баяцца. Вось сюды зараз будуць накіроўвацца міліцыянты, фатаграфаваць, здымаць на відэа...», - кажа адзін з арганізатараў акцыі Мікалай Чарнавус.
Вядомы ў Баранавічах грамадзкі актывіст Віктар Сырыца лічыць, што ў прадпрымальнікаў няма калектыўнага духу
«Канечне, гэтая акцыя не ўдалася. Яны ж індывідуальныя прадпрымальнікі. Самая галоўная бяда, што кожны сам за сябе, няма калектыўнага духу. Таму і не адбываецца гэтая акцыя пратэсту», - кажа Віктар Сырыца.
Акцыя ў Баранавічах доўжылася ня больш як адну гадзіну.
