Першыя вучэнні калектыўных сілаў АДКБ пройдуць увосень у Казахстане
2- 17.03.2009, 12:45
Міністр абароны РФ Анатоль Сердзюкоў паведаміў, што ў верасні на тэрыторыі Казахстана пройдуць першыя вучэнні Калектыўных сілаў аператыўнага рэагавання дзяржаваў АДКБ.
"Мяркуецца забяспечыць гэтыя сілы сучасным узбраеннем і ваеннай тэхнікай, спецыяльна распрацаванай формай адзення і экіпіроўкай", - сказаў ён на пашыраным паседжанні калегіі Мінабароны РФ.
А.Сердзюкоў паведаміў, што з расейскага боку ў склад Калектыўных сілаў увойдуць паветрана-дэсантная дывізія і асобная паветрана-дэсантная брыгада.
Таксама, па словах А.Сердзюкова, значным мерапрыемствам для Узброеных сілаў РФ у бягучым годзе будзе аператыўна-стратэгічнае вучэнне "Захад- 2009".
"Яно плануецца сумесна з узброенымі сіламі Беларусі. Прапрацоўваецца пытанне ўдзелу ў гэтых вучэннях Узброеных сілаў Рэспублікі Казахстан", - сказаў міністр.
Эксперты называюць калектыўныя сілы бяспекі АДКБ – карнымі вайсковымі групоўкамі, створанымі спецыяльна для задушэння мірных дэманстрацыяў пратэстаў у краінах, што ўваходзяць у АДКБ.
