Уладзімір Лабковіч: Закон «Аб амністыі» павінны выкарыстоўваць для вызвалення палітвязняў

Беларускія праваабаронцы ўпэўненыя, што, паводле прынятага закона «Аб амністыі», павінны быць вызваленыя ад пакарання моладзевыя актывісты, асуджаныя на «Працэсе 14-ці» за ўдзел у акцыях пратэсту прадпрымальнікаў.

«Безумоўна, мы, праваабаронцы, патрабуем, каб улады любым спосабам спынілі крымінальны пераслед актывістаў, асуджаных на «Працэсе 14-ці». Адным з прымальных для ўладаў варыянтаў можа стаць закон «Аб амністыі», пад які могуць падпасці моладзевыя актывісты і гэта вызваліць іх ад пакарання. Фармальна тут усё залежыць ад фармулёвак, якія ёсць у законе. Калі ў законе сказана, што амністыя не прымаецца ў дачыненні да асобаў, у дачыненні да якіх былі вынесеныя дысцыплінарныя спагнанні за парушэнне правілаў адбыцця пакарання, дык амністыя не будзе распаўсюджвацца ўдзельнікаў «Працэсу 14-ці». І гэтым улады пакажуць, што яны не маюць ніякага жадання нават фармальна адмяняць пакаранне ў дачыннені маладых апазіцыянераў», -- заявіў у інтэрв'ю прэс-цэнтру Хартыі’97 вядомы беларускі праваабаронца Уладзімір Лабковіч.

На думку праваабаронцы, ужыванне ўладамі закона «Аб амністыі» стане паказчыкам таго, наколькі ўлады хочуць праводзіць так званую «лібералізацыю».

«Безумоўна, удзельнікі «Працэсу 14-ці» з'яўляюцца палітвязнямі, і міжнародная грамадскасць павінна звярнуць на гэта ўвагу. Калі ў уладаў ёсць добрая воля, і яны прыслухаюцца да патрабаванняў беларускай і міжнароднай грамадскасці, дык яны выкарыстаюць механізмы закона «Аб амністыі» для вызвалення апазіцыянераў. Калі так званая «лібералізацыя» – гэта проста нічым не падмацаваныя словы, дык ўлады, вядома, не будуць вырашаць праблему наяўнасці ў краіне палітвязняў», -- склаў Уладзімір Лабковіч.

Нагадаем, што 15 красавіка «палата прадстаўнікоў» прыняла ў двух чытаннях законапраект «Аб амністыі ў сувязі з 65-годдзем вызвалення Беларусі ад нямецка-фашысцкіх захопнікаў», які быў унесены на разгляд Аляксандрам Лукашэнкам.

14 сакавіка ля Дома ўраду ў Менску была разагнаная акцыя з патрабаваннем амніставаць палітвязняў. Актывісты «Еўрапейскай Беларусі» сталі на плошчы Незалежнасці, трымаючы расцяжку «Амністыю ўдзельнікам «Працэсу 14-ці»!». Праз некалькі хвілінаў ахова Дома ўраду выклікала супрацоўнікаў міліцыі і апазіцыянераў звезлі ў Маскоўскі РУУС Менска.

Нагадаем, што «Справа 14-ці» – справа па арт. 342 Крымінальнага кодэкса Рэспублікі Беларусь, узбуджаная ў дачыненні да ўдзельнікаў мірнай акцыі пратэсту прадпрымальнікаў, якая прайшла ў Менску 10 студзеня 2008 года.

За ўдзел у гэтай акцыі моладзевы актывіст Андрэй Кім быў прысуджаны судом Цэнтральнага раёна Менска да 1,5 гадоў калоніі (вызвалены ў жніўні 2008 года). Актывіст грамадзянскай кампаніі «Еўрапейская Беларусь» Аляксандр Баразенка быў прысуджаны да абмежавання волі тэрмінам на 1 год без накіравання ў выпраўленчую ўстанову, з 27 кастрычніка да суду 9 снежня 2008 года ён утрымліваўся ў СІЗА. Астатнія ўдзельнікі «Працэсу 14-ці» -- Арцём Дубскі, Аляксей Бондар, Міхаіл Крываў, Міхаіл Пашкевіч, Аляксандр Стральцоў, Аляксандр Чарнышоў, Таццяна Цішкевіч, Міхаіл Субач і Павал Вінаградаў прысуджаныя да абмежавання волі на 2 гады без накіравання для адбывання пакарання ў спецыяльныя ўстановы. Максім Дашук, як непаўнагадовы, прысуджаны да паўтарох гадоў абмежавання волі.

Варта адзначыць, што Арцём Дубскі нібыта за парушэнне правілаў адбыцця пакарання вось ужо некалькі месяцаў знаходзіцца пад арыштам.