Шмідт датэрмінова пакідае пасаду кіраўніка офіса АБСЕ

Тэрмін паўнамоцтваў у нямецкага дыпламата сканчваецца ў лютым 2010 года. Аднак амбасадар сыходзіць ужо ў верасні гэтага года.

Як паведаміў БелаПАН прэс-сакратар офіса АБСЕ ў Менску Вадзім Хартынг, вергодна ўвосень будзе прызначаны новы кіраўнік офіса.

Паводле інфармацыі «Беларускага партызана», Ханс-Йохан Шмідт пакідае сваю пасаду ў сувязі са скандаламі і сваімі двухсэнсоўнымі заявамі.

Прэс-сакратар офіса АБСЕ не стаў каментаваць інфармацыю пра тое, што Шмідт пакідае сваю пасаду датэрмінова, але не выключыў, што на наступным тыдні амбасадар АБСЕ можа выступіць з заявай на гэты конт.

Між тым, цэнтральны офіс АБСЕ у Вене працягвае расследаванне па справе Ханса-Йохана Шмідта. Як вядома, у АБСЕ пададзеныя некалькі скаргаў на дзеянні цяперашняга кіраўніка Менскага Офіса АБСЕ: ад прадстаўнікоў «Маладога фронту», ад Аб'яднаных дэмакратычных сіл і ад былога кіроўцы офіса АБСЕ у Менску Сяргея Гаранкова.

8 верасня ў Менскім Офісе АБСЕ будзе прадстаўлены новы намеснік кіраўніка Офіса АБСЕ - казахскі дыпламат Жандас Асанаў.

Нагадаем, 8-10 чэрвеня ў Менск прыязджаў прафесар з універсітэта Пасаум Марцін Фінке (Нямеччына), які таемна вывучыў справу ваўкавыскіх прадпрымальнікаў. Гэты эксперт прыязджаў інкогніта і зрабіў выснову, што ў справе палітвязня Мікалая Аўтуховіча ніякіх парушэнняў няма - усё законна. Выснова была накіраваная ў амбасады еўрапейскіх краін, акрэдытаваныя ў Менску.

Як стала вядома пазней, ініцыятарам прыезду ў Менск нямецкага эксперта Марціна Фінке, стаў Ханс-Йохан Шмідт. Пры гэтым сам факт прыезду нямецкага эксперта стаў вядомы толькі пасля таго, як ён завяршыў вывучэнне справы Мікалая Аўтуховіча. Праваабаронцы адзначаюць, што падчас знаходжання ў Беларусі Марцін Фінке нават не сустрэўся з адвакатам і самім падследным.

Варта адзначыць, што ў Менску дзейнасць Офіса АБСЕ ужо даўно ацэньваюць неадназначна. Беларускія дэмакратычныя палітыкі ўпэўненыя, што цяперашняга мандата Офіса АБСЕ вельмі недастаткова для яго эфектыўнай працы ў Беларусі.

Таксама апазіцыянеры выказалі сваё абурэнне ў сувязі з «двухсэнсоўнымі» заявамі кіраўніка менскага офіса АБСЕ.

Так у інтэрв'ю БелаПАН Ханс-Йохан Шмідт заявіў, што ад беларускіх уладаў не варта патрабаваць «фундаментальных радыкальных змен». Ён таксама сказаў, што засяроджванне ўвагі толькі на правах чалавека супярэчыць інтэрасам АБСЕ.