Андрэй Бастунец: Перад выбарамі ўзмоцніцца кантроль за СМІ і інтэрнэтам
1- 5.01.2010, 9:16
У 2010 годзе дзейнасць недзяржаўных СМІ у Беларусі будзе істотна ўскладненая, а ўказ аб кантролі над інтэрнэтам будзе падпісаны.
Так лічаць эксперты грамадскага аб'яднання «Беларуская асацыяцыя журналістаў» (БАЖ).
«Калі мы ў 2010 годзе не спусцімся ніжэй, гэта будзе добра», — заявіў БелаПАН намеснік старшыні БАЖ Андрэй Бастунец.
«Указ аб рэгуляванні інтэрнэт-прасторы і інтэрнэт-рэсурсаў будзе падпісаны. Але ён будзе іншым. У крыху змякчэлых фармулёўках, але ён з'явіцца», — упэўнены Бастунец.
Паводле яго словаў, асаблівага ўзмацнення жорсткасці палітыкі ўладаў варта чакаць з пачаткам кампаніі па выбарах прэзідэнта. «Менавіта тады з'явіцца гэты ўказ, узмоцніцца жорсткасць практыкі ўжывання закона аб СМІ ў сферы кантролю», — лічыць прадстаўнік БАЖ.
Як лічыць эксперт, змяніць гэты песімістычны прагноз можа толькі эканамічная сітуацыя ў краіне і знешнепалітычная кан'юнктура.
Кіраўнік Цэнтра юрыдычнай абароны СМІ пры БАЖ Міхаіл Пастухоў таксама не сумняецца, што ўказ Лукашэнкі аб рэгуляванні інтэрнэт-прасторы будзе падпісаны. «Гэта будзе новым этапам узаемаадносінаў недзяржаўных СМІ і дзяржаўных органаў. Улада мае намер расчысціць «аўгіевыя стайні» інтэрнэту ад непажаданай інфармацыі, і праца ў гэтым накірунку будзе весціся вельмі інтэнсіўна», — заявіў Пастухоў.
Ён не выключыў, што гэта адбудзецца ў хуткім часе. «Я не сумняюся, што нам падрыхтавалі такія «навагоднія падарункі», — сказаў Пастухоў.
