Кіраўнічка Беларусбанка: Штодня людзі забіраюць з банкаў па 5-7 мільярдаў рублёў

«Гэта вялікая праблема», - прызнала старшыня пра найбуйнейшага беларускага банка.

Старшыня праўлення «Беларусбанка» заклапочаная адтокам рублёвых дэпазітаў насельніцтва з банкаўскай сістэмы, перадае «Інтэрфакс-Захад».

«Беларускія рублі зараз здымаюць (c дэпазітаў фізасобаў - ІФ) каля 5-7 млрд рублёў у дзень па сістэме. Гэта сёння праблема», - сказала Надзея Ермакова журналістам у чацвер у Менску.

Паводле яе словаў, гэтая тэндэнцыя характэрная для верасня. «Адток рублёвых укладаў працягваецца амаль месяц, напачатку месяца ён вырастаў, цяпер ідзе адносна роўны адток», - сказала кіраўнічка банка.

Ермакова мяркуе, што адной з асноўных прычынаў адтоку рублёвых дэпазітаў насельніцтва, характэрнага для верасня, стала «інфармацыйная вайна ў дачыненні да Беларусі ў расейскіх СМІ».