Сітуацыю ў Беларусі абмяркуюць «на высокім узроўні» у ЕЗ
4- 13.05.2010, 9:12
На восень цяперашняга года запланаваная канферэнцыя высокага ўзроўню для абмеркавання стратэгіі развіцця стасункаў з Беларуссю.
Пра гэта паведаміў БелаПАН балгарскі дэпутат, кіраўнік дэлегацыі Еўрапарламента ў парламенцкай асамблеі палітыкі ЕЗ «Усходняе партнёрства» (Еўранэст) Крысціян Вігенін.
Паводле яго словаў, чакаецца, што ў канферэнцыі прымуць удзел прадстаўнікі Еўракамісіі, Рады ЕЗ і Еўрапарламента.
Еўрадэпутат адзначыў, што Рада ЕЗ рэкамендавала падрыхтаваць сумесны прамежкавы план рэформаў для Беларусі. «Мы лічым, што гэты дакумент павінен быць як мага больш канкрэтным, прадугледжваць выразныя абавязальніцтвы кожнага з бакоў, за выкананнем якіх можна прасачыць», — сказаў Вігенін.
«Каб убачыць прагрэс у Беларусі, еўраструктуры павінны мець агульную скаардынаваную стратэгію, вылучаць не толькі патрабаванні, але і браць на сябе абавязальніцтвы ў адказ», — заявіў дэпутат. Ён адзначыў, што такая «дарожная карта» не павінна навязвацца, а стварацца ў супрацоўніцтве з беларускімі ўладамі і грамадзянскай супольнасцю краіны.
Вігенін лічыць, што беларусы могуць быць недастаткова паінфармаваныя аб ЕЗ, яго мэтах і каштоўнасцях.
Еўрадэпутат таксама назваў недастатковым прагрэс у галіне дэмакратычных рэформаў у Беларусі. Паводле яго словаў, прэзідэнцкія выбары «могуць даць моцны імпульс развіццю двухбаковых стасункаў і сур'ёзна паўплываць на іх агульную атмасферу». «Калі Лукашэнка так упэўнены ў сваёй папулярнасці, дык не будзе кантраляваць выбарчую кампанію і ціснуць на апазіцыю», — мяркуе Вігенін.
31 кастрычніка 2010 года сканчаецца тэрмін дзеяння санкцыяў у дачыненні да беларускіх чыноўнікаў, а таксама частковае прыпыненне гэтых санкцыяў.
Прэзідэнцкія выбары ў Беларусі павінны прайсці да лютага 2011 года.
