Мінюст: «Расея адмаўляецца ад прымірэння»

Афіцыйны Менск заяўляе пра рознагалоссі з РФ па рашэнні пытання пошлін.

Менск і Масква разыходзяцца ў разуменні умоваў для пазасудовага рашэння праблемы спагнання Расеяй вывазных пошлін на нафтапрадукты, што пастаўляюцца ў Беларусь, гаворыцца ў заяве беларускага Мінюста, апублікаванай у сераду, перадае РІА «Новости».

У аўторак у Менску адбылося чарговае пасяджэнне Эканамічнага суда СНД па іску ўрада Беларусі да ўрада Расеі аб спагнанні вывазных пошлін на нафтапрадукты.

«Ключавым пытаннем у ходзе пасяджэння было пытанне пра магчымасці прымірэння бакоў у пазасудовым парадку. У чарговы раз і Беларусь, і Расея прадэманстравалі гатоўнасць да канструктыўнага дыялогу і ўзаемавыгаднага рашэння спрэчнага пытання, - адзначаецца ў заяве. - Аднак, бакі разыйшліся ў разуменні умоваў для пазасудовага рашэння праблемы».

Беларускі бок адзначыў, што РФ парушае свае міжнародныя абавязацельствы перад Менскам і не робіць «рэальных крокаў» да прымірэння. Паводле дадзеных Мінюста, Менск прывёў лічбы прамых эканамічных страт у сувязі са спагнаннем Расеяй «незаконных», на яго думку, вывазных мытных пошлін.

«Беларусь у рамках сваіх працэсуальных правоў хадайнічала аб стварэнні судом адзінай умовы для прымірэнчых працэдураў. Прапаноўвалася ўвесці часовую забарону расейскаму боку на спагнанне вывазных мытных пошлін на нафтапрадукты, што пастаўляюцца ў Беларусь, - гаворыцца ў заяве. - (...) Толькі ў выпадку ўвядзення такой забароны беларускі бок выяўляе гатоўнасць да прымірэння».

Аднак суд адхіліў хадайніцтва Беларусі і даў бакам яшчэ адну магчымасць вырашыць справу без яго. Наступнае пасяджэнне суда адбудзецца 7 кастрычніка бягучага года.

Эканамічны суд СНД на пасяджэнні ў аўторак даў Маскве і Менску адзін месяц для таго, каб у пазасудовым парадку дамовіцца па пытанні спагнання Расеяй пошлін на пастаўляльныя ў Беларусь нафтапрадукты.

Такім чынам, суд задаволіў хадайніцтва расейскага боку, які прасіў перавесці дазвол спрэчкі ў пазасудовы парадак.

Суд таксама адхіліў хадайніцтва беларускага боку, які прасіў часова забараніць Расеі спаганяць экспартныя пошліны на нафтапрадукты да вырашэння спрэчкі.

Міністр юстыцыі рэспублікі Віктар Галаванаў, які прадстаўляе ў судзе ўрад Беларусі, заявіў, што не згодны з рашэннем суда, таму што прымірэнчая працэдура магчымая толькі пры згодзе абодвух бакоў. Ён растлумачыў, што беларускі бок згодны на пачатак прымірэнчай працэдуры толькі ў выпадку, калі будзе задаволенае яго хадайніцтва аб часовай забароне на спагнанне пошлін.

У адказ на гэта старшыня эканамічнага суда СНД Файзулла Абдулаеў растлумачыў, што ў выпадку, калі на працягу месяца бакі не прыйдуць да пагаднення, 7 кастрычніка суд пачне разгляд іску па сутнасці.

Намеснік міністра юстыцыі Расеі Васіль Ліхачоў, які прадстаўляе ў судзе расейскі ўрад, адзначыў важнасць дадзенага судовага працэсу, бо гэта першы іск, які эканамічны суд СНД разглядае, валодаючы паўнамоцтвамі эканамічнага суда ЕўрАзЭС. Адказваючы на пытанне пра рэальнасць дамовіцца па пытанні пошлін ў пазасудовым парадку, Ліхачоў заявіў, што «трэба браць два аркушы паперы, ручкі і пісаць аргументы аднаго і другога боку».

Раней беларускі бок ужо звяртаўся ў суд СНД з падобным хадайніцтвам, але суд адхіліў яго яшчэ на стадыі распарадчага пасяджэння.