Мікалай Статкевіч «не хоча» пісаць родным

Больш за два тыдні родныя не атрымлівалі ніякіх вестак ад палітвязня Мікалая Статкевіча, які адбывае шэсць гадоў зняволення ў Шклоўскай калоніі.

Улады стварылі вакол былога кандыдата ў прэзідэнты поўны інфармацыйны вакуум і тлумачаць гэтую ізаляцыю «нежаданнем» палітыка пісаць.

Менавіта такія адказы атрымлівае Марына Адамовіч, грамадзянская жонка кандыдата ў прэзідэнты Мікалая Статкевіча, з дзяржаўных структур. «Я стамілася ўжо адказваць на гэтае пытанне: звяртаемся ўсюды, і адусюль атрымліваем цалкам хамскія адказы. Ну, не хоча ён вам пісаць, з ім праведзеная «размова», - абураецца Марына Адамовіч у інтэрв'ю «Беларускаму партызану».

Апошні ліст Марына Адамовіч атрымала ад мужа 4 жніўня, ды яшчэ Мікалай Статкевіч змог тады патэлефанаваць дачцэ, праўда, гутарка доўжыўся ўсяго 1 хвіліну 6 секунд, пасля чаго была спыненая. Тады Ганна распавяла:

«Мне тата тэлефанаваў. Я паспела спытаць, як рука, тата адказаў, што рука лепей, і гіпс ужо знялі. Прагучала гэта такім тонам, што мне падалося, што з рукой ўсё роўна праблемы. Тата паведаміў, што яго зноў адпраўляюць на працы, але і гэта не так дрэнна, як тое, што яго хочуць перавесці на другі ярус (я так зразумела, што гаворка аб нарах), і што з такой рукой ён туды дакладна не залезе. Сказаў, што, мабыць, яму давядзецца спаць седзячы. На гэтых словах на заднім фоне пачуўся нейкі шум. На што тата зрэагаваў: «Я нешта не тое сказаў? Гэта ж праўда!»

А мне дадаў: «Тут прадстаўнікі адміністрацыі кантралююць маё тэлефанаванне». На гэтых словах сувязь абарвалася.

Уся размова доўжылася 1 хвіліну 6 секунд».

З таго самага часу родныя не атрымалі ні адной вестачкі ад Мікалая Статкевіча. 14 верасня былі «памілаваныя» трое «снежаньцаў», якія таксама знаходзіліся ў Шклоўскай калоніі. Калі да таго часу інфармацыя пра палітвязняў прасочвалася на волю праз пасярэднікаў або з аказіяй, то пасля таго, як Мікалай Статкевіч застаўся ў Шклове адзін, яго цалкам ізалявалі.

Між тым, яшчэ 7 верасня Мікалай Статкевіч атрымаў сур'ёзную траўму рукі; як аказалася пазней, траўміраваны і бок. Аднак нічога аб стане здароўя палітыка не вядома.

Палітык пазбаўлены магчымасці тэлефанаваць бацьку і грамадзянскай жонцы, лісты не пакідаюць межаў калоніі. Адміністрацыя калоніі праўдамі і няпраўдамі перашкаджае афармленню афіцыйных адносінаў паміж Статкевічам і ягонай грамадзянскай жонкай Марынай Адамовіч (пры гэтым у твар кідаючы жанчыне - «вы яму ніхто, пакуль няма штампа ў пашпарце»).

Праўда, адзначае Марына Адамовіч, як толькі пачаўся саміт «Усходняга партнёрства», пайшлі незразумелыя тэлефанаванні ад незнаёмых людзей, якія ці тое бачылі, ці тое чулі нешта пра Статкевіча.

Нагадаем, 26 мая суд Ленінскага раёна Менска па абвінавачванні ў арганізацыі «масавых беспарадкаў» прысудзіў Мікалая Статкевіча да шасці гадоў пазбаўлення волі ў калоніі ўзмоцненага рэжыму.