Алена Танкачова: Будзем высвятляць, адкуль з'явіліся «танцы на костках»

Беларуская праваабаронца ўспрыняла паведамленні дзяржаўных тэлеканалаў як асабістую абразу.

Дзяржаўныя тэлеканалы на працягу двух дзён агучвалі інфармацыю аб пасяджэнні камісіі Парламенцкай асамблеі Рады Еўропы ў Страсбургу, на якім разглядалася сітуацыя ў Беларусі. У прыватнасці адзначалася, што на ім прысутнічалі «спадар Бяляцкі і нейкая спадарыня Танкачова», якія, нібыта, прасілі ўвесці эканамічныя санкцыі супраць нашай краіны, якія «цынічна выціраючы ногі аб людское гора». Учора пра іх згадаў і Аляксандр Лукашэнка, які назваў праваабаронцаў прадстаўнікамі «пятай калоны», а іхнія паводзіны ахарактарызаваў як «танцы на костках».

Алена Танкачова ў прамым эфіры «Еўрарадыё» распавяла, што яна і Алесь Бяляцкі ведаюць пра гэтыя выказванні. Праваабаронца ўспрыняла іх як асабістую абразу.

«Мы вернемся ў Менск, я зраблю запыт да Белтэлерадыёкампаніі, кампаніі АНТ, і кампаніі СТВ, якія па адной паперцы чыталі гэты «выдатны» тэкст. Паспрабую высветліць, адкуль у іх гэтая інфармацыя, на падставе якой яны палічылі магчымым рабіць высновы аб «танцах на костках». А далей будзем разбірацца. Я буду чакаць выбачэнняў», - сказала Танкачова.

Алена Танкачова адзначыла, што на дзяржаўных тэлеканалах не было сказана ні слова наконт таго, што пасяджэнні ў ПАРЕ пачыналіся з хвіліны маўчання па ахвярам тэракту ў менскім метро.