Тарас Чарнавіл: Лукашэнка неадэкватны

Сябар камісіі па замежных справах Вярхоўнай Рады Украіны Тарас Чарнавіл лічыць, што для Віктара Януковіча болей разумна праігнараваць ўчорашнія заявы Аляксандра Лукашэнкі.

Зрэшты, сам палітык пракаментаваў іх даволі жорстка:

- Заявы ў прынцыпе абсалютна неадэкватныя. Паводзіны ў апошні час ў прэзідэнта Беларусі таксама нейкія дзіўныя. Маючы вельмі добрыя прэферэнцыі перад прэзідэнцкімі выбарамі, калі Еўразвяз шмат на што гатовы быў заплюшчыць вочы, трэба было проста карэктна прайсці выбарчы марафон і не дапусціць якіх-небудзь жорсткіх дзеянняў, якія, праўда, усё ж адбыліся. І можна было атрымаць індульгенцыю за вельмі многія злачынствы, здзейсненыя да гэтага.

Замест гэтага робіцца абсалютна дзікае зверства, зараз - неадэкватныя заявы. І гэта на фоне таго, што галоўны козыр беларускага кіраўніцтва аб самых лепшых умовах жыцця, самых нізкіх коштах, самых лепшых умовах працы сёння пачынае патроху раставаць. Таму думаю, што ў такіх умовах да гэтага можна ставіцца як да неадэкватнай нервовасці, якая на самой справе выглядае вельмі і вельмі дурна, - цытуе Тараса Чарнавіла Радыё «Свабода».