Прафанацыя. На біржы прададзена ўсяго 8 млн даляраў

Аб'ём таргоў замежнай валютай на дадсесіі Беларускай валютна-фондавай біржы (БВФБ) склаў Br68, 95 млрд, сказана ў паведамленні, размешчаным на сайце біржы.

Па выніках таргоў курс беларускага рубля да даляра ЗША склаў Br8,6 тыс./$1. Такім чынам, аб'ём прададзенай на таргах замежнай валюты склаў $8 млн у эквіваленце.

Аб'ём таргоў на асноўнай сесіі склаў Br201,6 млрд., што пры ўсталяваным курсе Br5355/$1 адпавядае $37,6 млн.

Адпаведна, аб'ём таргоў на рынкавай дадсесіі быў у 4,7 разы меншы за аб'ём таргоў на асноўнай сесіі, дзе прапанова валюты фарміруецца ў межах абавязковага продажу часткі валютнай выручкі і накіроўваецца Нацбанкам на куплю замежнай валюты для імпарту газу і электраэнергіі.

Курс беларускага рубля да даляра ЗША, які склаўся на дадсесіі быў на 3253 пункты (на 60,6%) вышэй за афіцыйны курс, да еўра - на 4819 пунктаў (на 65,3%) вышэй, да расейскага рубля - на 128,6 пункта (на 72,9%) вышэй за афіцыйны курс.

На дадсесіі таксама адбыліся ўгоды з польскім злотым, па выніках якіх курс склаў Br2,6 тыс./1 ​​злоты, што на 935 пунктаў (на 54,5%) вышэйза афіцыйны курс.