Менчукі вінныя камунальшчыкам амаль Br5 мільярдаў

Па стане на 1 студзеня бягучага года сума запазычанасці менчукоў за жыллёва-камунальныя паслугі (ЖКП) склала 4 млрд. 920 млн. рублёў.

Як паведамілі карэспандэнту агенцтва «Минск-Новости» у ГА «Менская гарадская жыллёвая гаспадарка» (МГЖГ), за другое паўгоддзе 2011 года яна знізілася на 130 млн. рублёў. У МГЖХ адзначаюць, што гэта станоўчая дынаміка: за гэты перыяд тарыфы на ЖКП выраслі, уведзеная дыферэнцыраваная плата за ваду, а за кошт заселеных і перададзеных на абслугоўванне ЖРЭА новабудоўляў колькасць асабовых рахункаў павялічылася амаль на 5 тыс. і склала 604.938.

З іх па 22.532 лічылася запазычанасць. Самая шматлікая, 21-тысячная катэгорыя неплацельшчыкаў (93%) - тыя, хто мае запазычанасць тэрмінам да 3 месяцаў. Ад 3 да 6 месяцаў ухіляліся ад квартплаты за ўсё 347 уласнікаў і наймальнікаў (1,5%). Больш за 6 месяцаў не аплачвалі камунальныя паслугі 1.063 чалавек (сем'яў) (4,8%).