Коштавы бум на арэнднае жыллё пратрымаецца да канца года?

Кошты на арэнднае жыллё ў жніўні выраслі ў сярэднім на 20 адсоткаў.

Здавалася б, «студэнцкі бум» ужо прайшоў і кошт здымных кватэр павінен паступова зніжацца. Рыэлтары ж спадзяюцца, што кошты на арэнднае жыллё пачнуць падаць хаця б у снежні. І лічаць, што самы спрыяльны час для пошуку здымнага жылля - люты, піша «Народная газета».

«Я ў прынцыпе не пераборлівы»

Перакладчык Арцём Голубеў ужо месяц шукае пакой. Пакуль Арцёму даводзіцца туліцца ў сястры свайго сябра: знайсці падыходны варыянт сёння няпроста.

- Раней здымаў пакой у двухпакаёвай кватэры, - распавядае хлопец. - Плаціў 600 тысяч рублёў у месяц - выдатныя ўмовы. Але гаспадары вырашылі зрабіць у кватэры рамонт, а заадно і цэннік падняць. Далі некаторы час на высяленне. А тут як раз кватэрны бум пачаўся...

Па словах Арцёма, кошты раслі кожны дзень. Але нават папярэдне дамовіўшыся з гаспадарамі, ніякіх гарантый атрымаць было нельга.

- Глядзіш аб'яву, тэлефануеш арэндадаўцу, здаецца ўсё добра, - кажа Арцём. - А праз пяць хвілін нехта прызначае кошт на дзесяць даляраў больш. Гаспадары ўслед таксама кошт павялічваюць. Аднойчы прапанавалі пакой без мэблі на Каменнай Горцы за 160 даляраў. Я ў прынцыпе не пераборлівы: мне не патрэбны добры рамонт, зручнае месцазнаходжанне. Галоўнае, каб у пакоі было самае неабходнае. І кошт быў у раёне 130 даляраў. Але цяпер знайсці такое жыллё нерэальна...

«Вы, відаць, не ў курсе коштаў на рынку»

Сапраўды, кошты на арэнднае жыллё сёння трымаюцца на вельмі высокім узроўні. Кошт арэнды аднапакаёвай кватэры ў Менску - ад 250 даляраў у месяц у лепшым выпадку, двухпакаёвая кватэра абыйдзецца ў 400 даляраў. Калі пашанцуе. Карэспандэнт «НГ» патэлефанаваў некалькім арэндадаўцам пад выглядам кватэраздымшчыка і выявіў, што нават дарагія кватэры сёння гатовыя адарваць з рукамі.

«Здам двухпакаёвую кватэру побач з cт. м. «Партызанская» - пазначана ў аб'яве. Кошт - 400 даляраў.

- Добры дзень, вы кватэру здаеце?

- Так, кватэра выдатная! Цёплая, знаходзіцца побач з метро, санвузел добры, паасобны...

- Але ж дарагавата.

- Ой, ведаеце, кватэру здаю не я, а мае знаёмыя. Яны і цэннік выстаўлялі.

Як аказалася, жадаючых паглядзець кватэру хоць адбаўляй. Мне прызначаюць час з дзевяці да дзесяці раніцы, каб прыехаць па паказаным адрасе.

Далей - больш. Яшчэ адна аб'ява: «Здаю двухпакаёвую кватэру з мэбляй і тэхнікай». Адрас - вуліца Казінца. Назваць гэты раён цэнтрам ніяк нельга, ды і новабудоўляў там фактычна няма. Аднак кошт указаны - 480 даляраў.

- А чаму кватэра такая дарагая? Яна ж не ў цэнтры, ды і дом, напэўна, старэнькі…

- Ой, малады чалавек! Вы, відаць, не ў курсе коштаў на рынку. Кватэр цяпер мала.

«Спадзяемся, што сітуацыя неяк зменіцца хоць бы ў снежні»

Ледзь лепш справы ідуць у рэгіёнах. Тут кватэру можна зняць разы ў два танней. Напрыклад, у Гродне прапануюць трохпакаёвую кватэру за 180 даляраў, у Віцебску «двушку» можна знайсці за 200 умоўных адзінак, а ў Лёзна і зусім два пакоі вы здымеце за 750 тысяч рублёў.

Але сталіца сваімі коштамі звыкла бянтэжыць. Разводзяць рукамі і рыэлтары: па іх словах, можна толькі гадаць, калі скончыцца коштавы бум.

- Кошт кватэр вырас у жніўні ў сярэднім на 20 адсоткаў, - распавялі ў адным з менскіх агенцтваў нерухомасці.

- У прынцыпе гэта сезонная з'ява: студэнты прыязджаюць на вучобу. Цяпер яны ўжо рассяліліся, але ўсё роўна попыт у некалькі разоў перавышае прапанову. За мінулы месяц, напрыклад, да нас паступіла 430 аб'ектаў і 2800 заявак. Мы, вядома, спрабуем пераканаць гаспадароў кватэр. Просім знізіць кошт, але пакуль безвынікова.

Па словах спецыялістаў, традыцыйна пераломнымі месяцамі на рынку арэнднага жылля лічацца кастрычнік і лістапад. Аднак у гэтым годзе, мяркуючы па ўсім, сезонны спад адбудзецца некалькі пазней.

- Застаецца толькі здагадвацца, калі кошты пойдуць уніз, - кажуць у агенцтве. - Звычайна сітуацыя цалкам мяняецца ў снежні - лютым. Наогул, люты - самы спрыяльны месяц для пошукаў здымнай кватэры. Прапанова у разы перавышае попыт. Але як будзе ў гэтым годзе, не ведаем. Самі вельмі спадзяемся, што сітуацыя неяк зменіцца хоць бы ў снежні...