Анджэй Пачобут: Аўтарытэт улад цяпер мінімальны

За падаўжэннем следства стаяць палітычныя прычыны, лічыць журналіст.

Следства па справе журналіста Андрэя Пачобута падоўжылі да 21 лістапада. Мера стрымання не змянялася, журналіст застаецца пад падпіскай аб нявыездзе, нагадвае «Радыё Свабода».

- Што думаеце пра падаўжэнне следства? Як гэта ўспрымаецца псіхалагічна?

- За гэтым стаяць палітычныя прычыны. Відавочна, улады вырашылі, што ім пакуль такі працэс не патрэбен, і сітуацыя пакуль застаецца ў падвешаным стане. Я буду пісаць далей, пакуль не пасадзяць.

- Вядома, што пасля вашага вызвалення з-за кратаў у чэрвені з вамі не праводзіліся следчыя дзеянні. Якія, на ваш погляд, цяпер у вашай справе могуць праводзіцца следчыя дзеянні?

- Я ведаю толькі, што адразу былі канфіскаваныя кампутары, на якіх я працаваў дома, па іх была праведзена экспертыза. Праўда, з яе вынікамі мяне не азнаёмілі. Але гэта былі тыя самыя кампутары, якія ў мяне канфіскоўвалі падчас папярэдняй справы. Думаю, што яны там усё хутка праверылі і ўсталявалі, што можа мець дачыненне да гэтай справы.

- Вас выпусцілі пад падпіску аб нявыездзе. А за гэты час даводзілася пакідаць Гродна?

- Я абавязаны знаходзіцца на тэрыторыі Гродна і выязджаць нікуды не маю права. Адзін раз я звяртаўся за дазволам, і мне такі дазвол далі. Я ездзіў летам у Наваградак на пахаванне. Больш не звяртаўся, хоць па працы неабходнасць была. Але хто мяне будзе пускаць пісаць рэпартажы?

- Памятаю вашы рэпартажы з менскага суда над Кавалёвым і Канавалавым, матэрыялы з Віцебска. А як цяпер працуеце?

- Сёння ў мяне такой магчымасці няма, але я працую з навінамі ці пішу аналітычныя тэксты.

- Што вас як журналіста найбольш прыцягвае ў цяперашніх падзеях у Беларусі?

- Аўтарытэт улады зараз мінімальны. Наогул, што самае дзіўнае, калі ўзяць сістэму беларускай эканомікі, то па ўсіх сусветных нормах яна не можа існаваць. Але яна ўжо 18 гадоў функцыянуе, і гэта цікава. І Лукашэнка пастаянна знаходзіць шчыліны, калі, здавалася б, усё ўжо павінна абрынуцца. Але яно зноў існуе, так як аказваецца, што можна гандляваць «растваральнікамі». І вось такія схемы эканамічныя - гэта вельмі цікава.

- Мабыць, цяпер застаецца больш часу, каб праводзіць яго з сям'ёй?

- Вядома, я значна больш часу стаў прысвячаць сям'і, улічваючы тое, што для ўсіх было вельмі складана, калі мяне пасадзілі і зноў могуць пасадзіць. Рэгулярна суботу - выходны дзень - цалкам аддаю сям'і, а сына кожны дзень ваджу ў садок.