Акцыянеры «Камунаркі» зацвердзілі павелічэнне дзярждолі

26 кастрычніка ў Менску адбыўся пазачарговы сход акцыянераў СААТ «Камунарка».

На ім было прынята рашэнне аб павелічэнні долі дзяржавы да крыху больш за 57%, паведамляе БелаПАН.

Па словах суразмоўцы агенцтва, прынятая адстаўка ранейшага складу назіральнага савета і абраны новы. Абнаўленне складу склала 100%. Сход акцыянераў зацвердзіў на пасаду генеральнага дырэктара прадпрыемства былога старшыню канцэрна «Белдзяржхарчпрам» Івана Данчанку.

Як паведамлялася раней, 12 кастрычніка на нарадзе па пытаннях развіцця кандытарскай галіны Аляксандр Лукашэнка даручыў ліквідаваць на прадпрыемствах «Камунарка» і «Спартак» назіральныя саветы і павялічыць долю дзяржавы да 57% - на «Камунарцы» і да 60% - на «Спартаку».

«Народнае павінна працаваць. Калі прыйшоў прыватнік і не працуе - значыць прадпрыемства, пакуль яно не знішчана, трэба вярнуць народу», - заявіў Лукашэнка на нарадзе.

Дзярждоля ў абодвух ААТ будзе павялічана праз дадатковую эмісію акцый, бязвыплатна перададзеных дзяржаве. Юрыдычнай падставай для ініцыявання канцэрнам «Белдзяржхарчпрам» правядзення дадатковай эмісіі стала рашэнне Вышэйшага гаспадарчага суда, які яшчэ ў жніўні гэтага года ўстанавіў, што дзяржаўная доля ў ААТ «Камунарка» і ААТ «Спартак» у свой час была прыніжаная.