Гігін: Я, бл.., каментаваць не буду (Аўдыё)

Прапагандыст Гігін нецэнзурна адрэагаваў на заявы Лукашэнкі аб шведскім самалёце.

Галоўны рэдактар часопіса «Беларуская думка» Вадзім Гігін пасля паведамлення незалежных СМІ аб прылёце ў Беларусь шведскага самалёта назваў дзяржаўнаму інфармацыйнаму агенцтву БелТА дзесяць пунктаў, якімі абгрунтаваў немагчымасць такой падзеі.

У артыкуле «Палёты ў сне і наяве» ён выказаў недавер незалежным журналістам і падкрэсліў сваю веру ў моц беларускай дзяржавы.

«Нестыковак, невытлумачальных фактаў і супярэчнасцяў занадта шмат, каб паверыць у гісторыю з перасячэннем мяжы. Навошта ж спатрэбілася гэтая правакацыя? Дыскрэдытаваць беларускія Узброеныя Сілы, пасеяць недавер да іх баяздольнасці, ды да таго ж нанесці ўдар прама па генералам, якія не раз даказвалі сваю адданасць Айчыне. Але нічога не атрымаецца! І заказчыкі гэтай правакацыі, і гаспадары Пачобута (хутчэй за ўсё, гэта адны і тыя ж асобы) выдатна ведаюць сілу і беларускага войска, і нашай сістэмы СПА. І асабіста я нікому не раю спрабаваць праверыць яе на трываласць», - заявіў тады Вадзім Гігін.

А вось як Вадзім Гігін пракаментаваў «Радыё Свабода» свае выказванні пасля таго, як прылёт шведскага самалёта ў Беларусь прызнаў Аляксандр Лукашэнка:

- Вы ў свой час выказвалі цвёрдае перакананне, што гэтага самалёта…

- Вы не хлусіце, ніякіх перакананняў я не выказваў наконт самалёта. Вы артыкул прачытайце.

- Але вы свае заявы пацвярджаеце гэтак жа, як і раней, ці…?

- Я, бл .., «Радыё Свабода», прабачце, нічога ні пацвярджаць, ні аспрэчваць не збіраюся. Зразумела? Вы ператэлефануеце каму-небудзь іншаму. Што вы мне тэлефануеце?