Лаўроў прыляцеў абмеркаваць правал беларускай СПА?

Кіраўніка МЗС Расеі цікавіць пытанне бяспекі паветранай прасторы «саюзнай дзяржавы».

Палітолаг, супрацоўнік Беларускага цэнтра еўрапейскіх даследаванняў Павел Усаў пракаментаваў сайту charter97.org візіт кіраўніка расейскага міністэрства замежных спраў Сяргея Лаўрова ў Беларусь.

«Лаўроў прыляцеў абмеркаваць далейшую інтэграцыю Беларусі і Расеі, а таксама пытанне выбудоўвання сумеснай стратэгіі бяспекі ва ўмовах міжнароднай ізаляцыі. Яшчэ адна з мэтаў візіту кіраўніка МЗС Расеі - разгляд пытання аб размяшчэнні расейскай сістэмы СРА на тэрыторыі Беларусі», - лічыць палітолаг.

«Нядаўна прэзідэнт Польшчы Браніслаў Камароўскі заявіў, што Польшча павінна развіваць сваю сістэму СРА. Падліла алею ў агонь і акцыя шведаў, якія перасяклі беларускую мяжу на лёгкаматорным самалёце. Таму на сустрэчы Лаўрова з Мартынавым і Лукашэнкам будуць абмяркоўвацца пытанні бяспекі паветранай прасторы», - адзначыў Павел Усаў.

«Але ў асноўным гаворка пойдзе аб міжнароднай палітыке, у першую чаргу гэта абмеркаванне сітуацыі ў Сірыі. У Расеі не так шмат саюзнікаў у сірыйскім пытанні. ЕЗ і ЗША хочуць зрабіць больш жорсткімі рэзалюцыі па Сірыі і ўвесці эмбарга. Расея і Кітай блакуюць гэтыя рэзалюцыі. Сірыя - найважнейшы стратэгічны партнёр Беларусі. Беларусь прымала ўдзел у пастаўках зброі гэтай краіне, і Лукашэнка не раз падкрэсліваў, што Башар Асад яго сябар і партнёр», - распавёў палітолаг.

Нагадаем, сёння кіраўнік МЗС Расеі Сяргей Лаўроў адпраўляецца з візітам у Беларусь. Паводле афіцыйнай інфармацыі, у ходзе візіту Сяргей Лаўроў правядзе перамовы са сваім беларускім калегам Сяргеем Мартынавым, «Мяркуецца правесці паглыблены абмен думкамі па актуальных міжнародных праблемах, уключаючы пытанні забеспячэння рэгіянальнай і еўрапейскай бяспекі. Плануецца таксама абмеркаваць магчымасці далейшага пашырэння і паглыблення ўзаемадзеяння ў рамках інтэграцыйных структур на прасторы СНД, перш за ўсё, «саюзнай дзяржавы», Мытнага саюза і Адзінай эканамічнай прасторы, АДКБ».