МЗС патрабуе выключыць Макея са спісу неўяздных у ЕЗ

Новы міністр замежных спраў разлічвае на выключэнне сябе з «чорнага спісу».

«З пункту гледжання здаровага сэнсу, міністр замежных спраў любой краіны мае свабоду кантактаў з любымі партнёрамі - гэта з'яўляецца сутнасцю дыпламатычнай дзейнасці, якая заключаецца ў арганізацыі ўзаемадзеяння ў любых умовах», - заявіў агенцтву «Інтэрфакс-Захад» начальнік упраўлення інфармацыі - прэс-сакратар МЗС Беларусі Андрэй Савіных.

«Як гэта разумеюць нашы заходнія візаві - пакажа час», - сказаў Савіных, адказваючы на пытанне агенцтва пра тое, як беларускі бок ставіцца да таго, што ізноў прызначаны міністр замежных спраў Уладзімір Макей раней, будучы кіраўніком Адміністрацыі прэзідэнта, быў уключаны ў санкцыйныя спісы ЕЗ.

Як паведамлялася, былы кіраўнік Адміністрацыі Лукашэнкі Макей быў уключаны ў спіс неўяздных у ЕЗ беларускіх чыноўнікаў і службовых асоб пасля падзей 19 снежня 2010 года, калі праваахоўныя органы здушылі акцыю пратэсту нязгодных з вынікамі прэзідэнцкіх выбараў.

У цяперашні час у абмежавальны спіс уключаны 243 беларускія службовыя асобы.

На былога кіраўніка МЗС Беларусі Сяргея Мартынава, які ўказам прэзідэнта ў панядзелак вызвалены ад сваёй пасады, санкцыі ЕЗ не распаўсюджваюцца.

Мартынаў працаваў кіраўніком беларускага знешнепалітычнага ведамства з сакавіка 2003 года.