Менчукі гатовыя плаціць за рэцэпты, але не больш за 100 тысяч

Жыхары сталіцы Беларусі распавялі, як часта ходзяць у паліклінікі.

У лістападзе нас ускалыхнула навіна пра тое, што ўсе лекі будуць адпускаць толькі паводле рэцэпта. Цяпер Міністэрства аховы здароўя ўдакладніла спіс прэпаратаў, якіх правіла не закране. Аднак моцна сітуацыя не змянілася. Што рабіць хвораму - стаяць у чарзе да ўчастковага лекара або пайсці за запаветным бланкам ў платны цэнтр? Меркаванні падзяліліся, піша «Комсомольская правда в Беларуси».

Вольга, выхавальніца і маладая мама:

- У паліклініцы была апошні раз месяцы два таму. У экстранай сітуацыі, калі б хутка спатрэбіліся лекі, я, хутчэй за ўсё, звярнулася б у платны цэнтр. Дзякуй богу, не хварэем.

Максім, сістэмны адміністратар:

- Цярпець не магу сядзець у чэргах, таму ў паліклініцы рэдкі госць. Калі прастыў, сам ведаю, якога аспірыну выпіць. Дзеля паперкі ісці да лекара? Напэўна, буду звяртацца ў платныя цэнтры - так хутчэй. Або па магчымасці лячыцца малаком з мёдам.

Тамара, усмешлівы бухгалтар:

- Да ўчастковага лекара даўно не звярталася. У платным цэнтры гатовая заплаціць 50 тысяч... Ці нават да 100.

Загадкавы Яўген:

- У паліклініку даўно не хадзіў, пра сітуацыю з рэцэптамі не ў курсе. Нават не ведаю, колькі гатовы заплаціць за рэцэпт. Тысяч 50, 70... Дакладна не больш.

Вераніка, мама двухгадовага Арцёма:

- Заўсёды страшна весці дзіцяці ў паліклініку: вакол столькі заразы рознай. А калі яшчэ і за рэцэптамі хадзіць... Платныя паслугі - гэта выхад. Да 100 тысяч гатова аддаць.

Валяр'ян, пенсіянер:

- У лекара быў 8 дзён таму, як раз за рэцэптам хадзіў. Я ў часе не абмежаваны, нікуды не спяшаюся, таму і ў чарзе спакойна пасядзеў. У мяне і выйсця іншага няма - мне без майго леку нікуды.

Галіна Міхайлаўна, супрацоўніца школы:

- Толькі з паліклінікі. Не сказала, што людзей больш, чым звычайна. Да ўчастковага тэрапеўту за рэцэптам звяртацца больш звыкла.

Спачувае бабуля, якая адмовілася называць сваё імя:

- Шкада дактароў: ім цяпер столькі паперак пісаць, а яны і так занятыя, проста дадатковая праца. Мне такое новаўвядзенне не падабаецца. З іншага боку, гэта клопат пра нас, каб людзі не прызначалі сабе таблеткі самі. Усё для выгоды хворых.

Аляксандр, супрацоўнік IT-сферы:

- Толькі з бальнічнага. Лячыўся і рэцэпт браў у звычайнай паліклініцы. Шчыра кажучы, не бачу сэнсу ісці ў платны цэнтр. Усім вядома, што адны і тыя ж лекары раніцай працуюць у дзяржаўных арганізацыях, а вечарам - у прыватных. Так што ўзровень лячэння ўсё роўна аднолькавы.

Сяброўкі Ганна і Юлія, студэнткі:

- Не падабаецца, што ў аптэках будуць пастаянна патрабаваць рэцэпты. Часта бацькі і самі ведаюць, якія лекі даць дзіцяці. А так трэба будзе абавязкова ісці да доктара.

Аліна, студэнтка МДЛУ:

- Думаю, такое рашэнне многім ускладніць жыццё. Раней прасцей было. Не люблю сядзець у чэргах. Цяпер лепш не хварэць.