Максім Вінярскі 11 дзён трымае галадоўку ў турме

Каардынатара «Еўрапейскай Беларусі» штодня правяраюць лекары.

Каардынатар «Еўрапейскай Беларусі» Максім Вінярскі, якога напярэдадні Чарнобыльскага шляху прэвентыўна арыштавалі на 12 сутак, вызваляецца з турмы на Акрэсціна 4 траўня.

Першыя 9 дзён арышту Максім Вінярскі трымаў сухую галадоўку, потым пачаў піць ваду, але ад ежы да гэтага часу адмаўляецца.

Адвакат распавяла «Радыё Свабода» аб стане здароўя зняволенага.

«Стан здароўя нармальны, лекар у яго бывае кожны дзень. Такі адказ сёння мне даў дзяжурны ізалятара. Ён застаўся ў той жа камеры, дзе і быў, пра якую скардзіўся, што там няма лямпачкі пад столлю і цёмна чытаць. Хацелі замяніць лямпачку, але аказалася, што зламаны патрон, таму, маўляў, не ўкруцілі. Яшчэ радыё там дрэнна чуваць. Але ён больш не прасіў, каб я настойвала на змене камеры, сказаў, што там застанецца. Мала да каго яго падсадзяць, раптам да таго, з кім будзе яшчэ больш складана, розныя ж арыштанты бываюць. Наважыў дасядзець ў камеры», - распавяла адвакат.

Акрамя скаргі на ўмовы ў камеры Максім Вінярскі аспрэчыў прысуд, які яму вынесла суддзя Людміла Лапо з Заводскага суда.

Час меркаванага выхаду Максіма Вінярскага з турмы на Акрэсціна - 4 траўня, 11:00 15 хвілін.

Нагадаем, каардынатар грамадзянскай кампаніі «Еўрапейская Беларусь» быў затрыманы супрацоўнікамі міліцыі 22 красавіка ў Менску на выхадзе з гандлёвага цэнтра «Карона». Актывісту заявілі, што ён «падобны на чалавека, які знаходзіцца ў вышуку», аднак ужо ў аддзяленні міліцыі яго абвінавацілі ў непадпарадкаванні супрацоўнікам праваахоўных органаў і склалі пратакол аб адміністрацыйным правапарушэнні. У той жа дзень суддзя Фрунзенскага суда Менска Людміла Лапо прызнала Максіма Вінярскага вінаватым і прысудзіла да 12 сутак арышту.

Падчас суда актывісту, у якога на той момант была вострая ангіна, стала дрэнна. Медыкі хуткай дапамогі, якія прыбылі, канстатавалі, што ён мае патрэбу ў шпіталізацыі, аднак міліцыянты заявілі, што адвязуць яго ў ЦІП. У адказ Максім Вінярскі абвясціў сухую галадоўку.

Актывіст звязвае сваё затрыманне з імкненнем уладаў не дапусціць яго ўдзелу ў «Чарнобыльскім шляху», які прайшоў 26 красавіка. Існуе рэальная пагроза таго, што ўлады не абмяжуюцца гэтым пакараннем і, як ужо бывала, знойдуць спосаб падоўжыць яго знаходжанне ў турме, каб не дапусціць яго знаходжання ў Менску падчас Чэмпіянату свету па хакеі. Менавіта таму ён аб'явіў сухую галадоўку.

За апошні час Максім Вінярскі правёў у турме больш за 300 сутак, што сур'ёзна паўплывала на стан яго здароўя. Падчас апошняга затрымання супрацоўнікі міліцыі патрабавалі ад яго пакінуць Менск на час правядзення Чэмпіянату свету па хакеі.