Меркель не бачыць прычын скасоўваць санкцыі супраць Расеі

Прыярытэтам для ЕЗ з'яўляецца аднаўленне тэрытарыяльнай цэласнасці Украіны: спачатку Данецк і Луганск, затым - Крым.

Скасоўваць еўрапейскія санкцыі супраць Расеі няма сэнсу, пакуль Масква не ліквідуе іх прычыны, сказала канцлер Нямеччыны Ангела Меркель, піша zn.ua.

"Гэтага пакуль не адбылося", - сказала яна на форуме ў Давосе.

Меркель заявіла, што Расея парушыла пасляваенны мірны парадак у Еўропе, анексаваўшы Крым.

"Нашая мэта - тэрытарыяльная цэласнасць Украіны, якую трэба аднавіць. Мы не забываем і пра Крым, але Данецк і Луганск - гэта першы прыярытэт", - сказала Меркель.

"Спачатку трэба забяспечыць стабільнасць, а далей у больш шырокіх рамках разгледзець магчымасці супрацоўніцтва ў эканамічнай зоне, якая, як кажа прэзідэнт Пуцін, цягнецца ад Уладзівастока да Лісабона. Спадзяюся, што тут магчымасці адкрыюцца", - заявіла канцлер.