Кэмеран прыгразіў вывесці санкцыі супраць Расеі на «новы ўзровень»

Расея не можа парушаць міжнародныя правілы і пры гэтым мець доступ да міжнародных рынкаў і фінансаў.

З такой пазіцыяй выступіў прэм'ер-міністр Вялікабрытаніі Дэвід Кэмеран.

Захаду неабходна распрацаваць жорсткі доўгатэрміновы адказ Расеі з нагоды напружанасці ва Украіне. Дэвід Кэмеран і іншыя лідары гатовыя вывесці санкцыі супраць Расеі на «зусім новы ўзровень» у тым выпадку, калі Масква будзе нарошчваць сваю агрэсію, паведамляе The Wall Street Journal.

«Калі Расея парушае правілы XXI стагоддзя і займаецца дэстабілізацыяй суверэннай краіны, то ўвесь астатні свет павінен быць гатовы сказаць Расеі: «Вы не можаце парушаць адну частку міжнародных правілаў, пры гэтым маючы доступ да міжнародных рынкаў, міжнародных фінансаў і міжнародных сістэм», - цытуе выданне Кэмерана.

Заходнія лідары будуць гатовыя прыняць санкцыі «на зусім іншым узроўні», калі адбудзецца які-небудзь інцыдэнт, падобны атачэнню ўкраінскага войска ў Дэбальцаве. Захад павінен быць гатовы «вызначыцца са сваёй доўгатэрміновай і рашучай пазіцыяй" супраць Расеі, пераказвае выданне пазіцыю прэм'ера Вялікабрытаніі, піша РБК.

4 сакавіка памочніца дзяржсакратара ЗША ў пытаннях Еўропы і Еўразіі Вікторыя Нуланд заявіла, што прадстаўнікі ЗША і ЕЗ абмяркоўваюць магчымасць увядзення далейшых сектаральных санкцый супраць Расеі ў выпадку парушэння Менскіх пагадненняў. «Як сказаў прэзідэнт [ЗША Барак Абама], мы будзем судзіць аб Расеі паводле яе учынкаў, а не са слоў», - прыводзілася яе заява на сайце Дзярждэпу ЗША. Амерыка ўжо пачала кансультацыі з Еўразвязам у гэтым пытанні. Санкцыі могуць быць прынятыя, «калі Расея будзе прадаўжаць распальваць агонь на ўсходзе або ў іншых частках Украіны, не будзе выконваць Менскія пагадненні або будзе захопліваць новыя тэрыторыі, як гэта было з Дэбальцавам», дадала Нуланд.

У той жа дзень прэзідэнт ЗША Барак Абама падпісаў указ аб прадаўжэнні падстаў для санкцый супраць Расеі яшчэ на адзін год. У адпаведнасці з ім захоўваецца «рэжым надзвычайнага становішча, уведзены ў сувязі са спробамі падарваць дэмакратычныя працэсы ва Украіне, парушыць яе суверэнітэт і тэрытарыяльную цэласнасць». Пастанова ЗША аб прадаўжэнні санкцый у дачыненні да Расеі ў МЗС назвалі спробай сарваць мірны працэс урэгулявання ўкраінскага канфлікту.