Палітвязня Рубцова змесцяць у следчы ізалятар

Гомельскага актывіста Юрыя Рубцова абвінавачваюць ва ўхіленні ад адбыцця пакарання.

Яго ўвечары 13 красавіка, даставяць у следчы ізалятар у Баранавічах, паведамляе БелаПАН.

Праваабаронца Наста Лойка распавяла: «У сапраўдны момант яго перавозяць з Пружанскага ІЧУ, і ў Баранавічах ён будзе ўжо сёння ўвечары".

Афіцыйныя абвінавачванні Юрыю Рубцову былі выстаўленыя 9 красавіка. На наступным тыдні, сказала Лойка, гомельскі актывіст і яго адвакат пачнуць знаёміцца з матэрыяламі крымінальнай справы.

Днём 6 красавіка Рубцоў быў дастаўлены з папраўчай установы адкрытага тыпу ў вёсцы Куплін (Пружанскі раён Брэсцкай вобласці), дзе ён адбываў пакаранне, у Пружанскі раённы аддзел Следчага камітэта. Там стала вядома, што актывіст абвінавачваецца паводле арт. 415 Крымінальнага кодэкса (ухіленне ад адбыцця пакарання ў выглядзе абмежавання волі). Рубцоў адмовіўся ад паслуг прапанаванага яму дзяржаўнага адваката і абвясціў галадоўку. Ён таксама адмовіўся ад дачы паказанняў следчай Вользе Барадоўскай, якая вядзе яго крымінальную справу.

Нагадаем, 6 кастрычніка 2014 года суд Цэнтральнага раёна сталіцы прыгаварыў 53-гадовага Рубцова да двух з паловай гадоў абмежавання волі з накіраваннем у папраўчую ўстанову адкрытага тыпу, аднак з улікам амністыі рэальны тэрмін пакарання быў скарочаны да паўтара года. Рубцоў абвінавачваўся ў абразе суддзі суда Савецкага раёна Кірылы Палулеха, які вёў у дачыненні да яго адміністрацыйны працэс пасля акцыі "Чарнобыльскі шлях» 28 красавіка 2014 у Менску (арт. 391 Крымінальнага кодэкса).