Сацыял-дэмакраты патрабуюць спыніць ціск на Мікалая Статкевіча

Сацыял-дэмакраты заклікаюць усе левыя і дэмакратычныя партыі і групы Беларусі выступіць у абарону Мікалая Статкевіча.

«З калоніі №17 у Шклове прыйшла трывожная вестка аб тым, што адміністрацыя гэтай установы ўзмацніла ціск на палітычнага зняволенага Мікалая Статкевіча. Ёсць намер праз судовую працэдуру перавесці яго з калоніі ў турму», - гаворыцца ў заяве прэзідыума Беларускай сацыял-дэмакратычнай партыі (Грамада).

На думку партыі, гэтыя меры накіраваны на тое, каб прымусіць Статкевіча напісаць прашэнне аб памілаванні і такім чынам прызнаць сябе вінаватым.

«Беларуская сацыял-дэмакратычная партыя (Грамада) выказала сваю салідарнасць з палітвязнем Мікалаем Статкевічам і патрабуе спыніць адміністрацыйны ціск у дачыненні да яго. Партыя патрабуе таксама адмовіцца ад намеру памяняць рэжым утрымання зняволенага Мікалая Статкевіча. Беларускія сацыял-дэмакраты настойліва заклікаюць адміністрацыю калоніі №17 і дэпартамент выканання пакаранняў скасаваць дысцыплінарныя спагнанні, накладзеныя на Мікалая Статкевіча цягам апошняга часу, і ануляваць акты аб парушэнні ім дысцыпліны», - адзначаецца ў заяве.

Сацыял-дэмакраты выказваюцца за тое, каб да Статкевічу былі дапушчаныя праваабаронцы і прадстаўнікі міжурадавых устаноў, між іншым прадстаўніцтва ААН у Беларусі, а таксама дыпламатычных місій краін Еўрапейскага звязу.

Беларуская сацыял-дэмакратычная партыя (Грамада) звяртаецца да сацыялістычнай Інтэрнацыяналу, Партыі еўрапейскіх сацыялістаў, групе сацыялістаў і дэмакратаў у Еўрапейскім парламенце і асабіста да старшыні Еўрапарламента Марціна Шульца «з заклікам прадэманстраваць салідарнасць сусветнай і еўрапейскай сацыял-дэмакратыі з Мікалаем Статкевічам».

58-гадовы Мікалай Статкевіч - адзіны кандыдат у прэзідэнты Беларусі на выбарах 2010 года, які дагэтуль знаходзіцца ў зняволенні. У траўні 2011-га ён быў прысуджаны да шасці гадоў пазбаўлення волі на абвінавачванне ў арганізацыі масавых беспарадкаў у дзень прэзідэнцкіх выбараў. Міжнародныя праваабарончыя арганізацыі прызналі Статкевіча палітычным зняволеным.

Цяпер Статкевіча чакае новы суд, яму пагражае ўзмацненне жорсткасці рэжыму.