Аўдронюс Ажубаліс падтрымаў патрабаванне аб адстаўцы Майры Моры

Экс-міністр замежных спраў Літвы мяркуе, што кіраўніца Прадстаўніцтва ЕЗ у Беларусі павінна сысці ў адстаўку.

Экс-міністр замежных спраў Літвы, дэпутат Сейма і намеснік старшыні камітэта літоўскага парламента па замежных справах Аўдронюс Ажубаліс падтрымаў патрабаванне кіраўніка шведскай праваабарончай арганізацыі Östgruppen Марціна Углы аб адстаўцы кіраўніцы Прадстаўніцтва ЕЗ у Беларусі Майры Моры ў сувязі з «вычэрпваннем крэдыту даверу».

Пра гэта палітык напісаў у «Твітэры».

Нагадаем, шведскія праваабаронцы мяркуюць, што дзейнасць кіраўніцы Прадстаўніцтва ЕЗ у Беларусі Майры Моры супярэчыць палітыцы ЕЗ.

«Замест таго, каб выразна выказаць афіцыйную лінію ЕЗ у падтрымку дэмакратыі і правоў чалавека ў Беларусі, Майра Мора неаднаразова дзейнічала такім чынам, што гэта хутчэй служыла інтарэсам нелегітымнага рэжыму Лукашэнкі. Таму яна вычарпала свой крэдыт даверу як прадстаўніца ЕЗ», - заявілі ў Östgruppen.

Праваабаронцы адзначаюць, што падчас праўлення Моры рэпутацыя Прадстаўніцтва ЕЗ у Менску значна пагоршылася сярод беларускіх дэмакратычных сіл. Арганізацыя заклікае ўрад Швецыі падняць гэтае пытанне ў ЕЗ.