Вядучы нямецкі вірусолаг уважае за магчымы канец пандэміі ў 2022 годзе

Аднак важна, каб як мага больш людзей прайшлі вакцынацыю.

Вядучы нямецкі вірусолаг мяркуе, што Нямеччына ўжо ў 2022 годзе зможа вярнуцца да жыцця, якое было да пандэміі COVID-19. Аднак наступнай зімой навуковец чакае новага ўсплёску захворвання, паведамляе DW.

Кіраўнік аддзела вірусалогіі берлінскай універсітэцкай клінікі Charité Крысціян Драстэн (Christian Drosten) мяркуе, што цягам 2022 года COVID-19 увойдзе ў Нямеччыне ў эндэмічную фазу і можна будзе абвясціць аб заканчэнні пандэміі. Пра гэта навуковец распавёў выданню Tagesspiegel am Sonntag у нядзелю, 16 студзеня. З ягоных слоў, «даволі вялікая частка гэтага шляху ўжо пройдзеная дзякуючы вакцынацыі» і цяпер краіна павінна скончыць гэты шлях.

Крысціян Драстэн адзначыў, што папуляцыйны імунітэт супраць каранавіруса ў дарослых развіваецца ў «правільным кірунку». «Насельніцтва фармуе імунітэт і захоўвае яго», - падкрэсліў ён.

Рана ці позна SARS-CoV-2 інфікуюцца ўсе

Вірусолаг параўнаў высокакантагіёзны варыянт «амікрон», які адрозніваецца больш мяккай плынню захворвання, з «цягніком, у які на хаду заскокваюць людзі». З ягоных слоў, «не існуе альтэрнатывы» таму, што рана ці позна ўсе будуць заражаныя каранавірусам SARS-CoV-2. Аднак важна, каб як мага больш людзей прайшлі вакцынацыю. Драстэн адзначыў, што для Нямеччыны, якая адрозніваецца большай доляй людзей сталага веку, вакцынацыя з'яўляецца адзіна правільным шляхам. Натуральная імунізацыя магла б прывесці да занадта вялікай колькасці смяротных зыходаў.

Драстэн таксама ўскладае вялікія надзеі на магчымую «жывую вакцыну». Яна можа быць зробленая ў выглядзе спрэю, з дапамогай якога штучна аслабленыя. - Рэд.) вірусы або іх мадэрнізаваны варыянт» будуць упырсквацца ў нос і спрыяць выпрацоўцы імунітэту на слізістай абалонцы. «Гэта было б значна лепшым спосабам аховы ад заражэння, наступнай вяхой», - мяркуе навуковец.

Новы рост захворвання магчымы

На думку Драстэна, Нямеччына ўжо ў 2022 годзе зможа вярнуцца да жыцця, якое было да пандэміі. Аднак наступнай зімой навуковец чакае новага значнага росту захворвання. «Імаверна, нам зноў давядзецца насіць маскі ў памяшканнях, бо імунітэт зноў крыху знізіцца, і ўразлівыя пласты насельніцтва трэба будзе зноў засцерагаць», - адзначыў ён.

Пры гэтым навуковец адзначыў, што чалавецтва атрымала і «некаторыя перавагі». Вірус прасунуў медыцыну, растлумачыў ён. «Тэхналогія мРНК – гэта вялікі прарыў, у тым ліку і для барацьбы з ракам, і для іншых інфекцыйных захворванняў», – заявіў Драстэн.