У Туркменістане ўвялі жорсткі карантын

Закрыты рынкі і ГЦ, паміж рэгіёнамі абмежаваны рух.

У Туркменістане, дзе ўлады працягваюць настойваць на тым, што ў краіне каранавірусу няма, зноў увялі жорсткі карантын. Пра гэта паведамляе туркменская служба Радио Свобода.

Першымі аб уведзеных абмежаваннях даведаліся жыхары Ашхабада. 15 студзеня ў сталіцы закрылі рэчавыя кірмашы, гандлёвыя цэнтры, тэатры, канцэртныя залы, рэстарацыі, цырульні і іншыя прадпрыемствы сферы абслугоўвання. Працуюць толькі харчовыя крамы.

«Для мяне гэта стала нечаканасцю. Напрыклад, у культурна-забаўляльным цэнтры «Парахат» на вуліцы Махтумкулі за дзень да гэтага правялі ўрачыстасць з нагоды вяселля, а ў суботу раніцай ён ужо быў закрыты. У суботу там павінна была прайсці яшчэ адна вясельная ўрачыстасць. Адзін з работнікаў сказаў, што распараджэнне аб закрыцці яны атрымалі толькі раніцай, калі прыйшлі на працу», - распавёў жыхар Ашхабада.

Аналагічныя абмежаванні ўвялі і ў іншых рэгіёнах краіны: Балканскай, Лебапскай і Марыйскай абласцях.

Жыхар Марыйскай вобласці расказаў, што ім абмежавалі ўезд і выезд з вобласці. «У нас і так апошнія дзесяць дзён было ўзмацненне і ўсіх правяралі. Цяпер зноўку ўвялі карантын. Людзі паміж сабой абмяркоўваюць, што карантын проста падстава, а напраўду ўлады баяцца магчымага бунту», – мяркуе ён.

Turkmen.news 15 студзеня апублікавала копію меркаванага рашэння Надзвычайнай камісіі ў барацьбе з распаўсюджваннем хвароб, дзе ўказаны абмежаванні, якія складаюцца з 23 пунктаў. Акрамя таго, у адпаведнасці з гэтым дакументам жыхарам прамежных рэгіёнаў да 1 лютага прадпісана абмежаваць уезд і выезд у абласныя цэнтры, іншыя раёны і вобласці. З 15 студзеня да 1 лютага таксама скарочана колькасць рэгулярных авіярэйсаў з Ашхабада ў адміністрацыйныя цэнтры рэгіёнаў і назад да аднаго за дзень.

Незалежныя СМІ пішуць, што COVID-19 у краіне ёсць даўно, ад яго памерла нямала людзей. Туркменская служба Радыё Свабода ў кастрычніку са спасылкай на крыніцы ў міністэрстве аховы здароўя паведамляла, што ад пачатку эпідэміі ў 2020 годзе ў Туркменістане ад каранавіруса памерлі больш за 25 тысяч чалавек.

Кіраўнік Туркменістана Гурбангулы Бердымухамедаў раней на сустрэчы з дырэктарам Еўрапейскага рэгіянальнага бюро САЗ Хансам Клюге ў Ашхабадзе яшчэ раз заявіў аб поўнай адсутнасці каранавіруса ў краіне. На яго сцвярджэнне, у Туркменістане вакцынавана «больш за 70% насельніцтва».