Расейскі бізнэс пачаў рыхтавацца да росту даляра да 120 рублёў

Паслабленне расейскага рубля неўнікнёнае.

Расейскія кампаніі, якія набываюць тавары за мяжой, рыхтуюцца да далейшага паслаблення курсу рубля, паведамляе «Коммерсант» са спасылкай на прадстаўнікоў некалькіх імпарцёраў.

Паводле словаў адной з крыніцаў «Коммерсанта», прадпрымальніка, які завозіць у РФ абсталяванне, ягоная кампанія закладвае ва ўнутраныя разлікі даляр за 120–125 рублёў.

У найбліжэйшыя тры-шэсць месяцаў могуць быць дасягнутыя ўзроўні 110–120 рублёў за даляр, мяркуе суразмоўца «Коммерсанта». Аднак бізнэс аддае перавагу працаваць «з запасам», тлумачыць ён: «Не думаю, што ў кагосьці з імпарцёраў ёсць аптымізм наконт умацавання рубля. Прасцей закласці спрэд большы».

Узровень 115 рублёў за даляр называе таксама Ксенія Расава, генеральная дырэктарка Finn Flare – аднаго з найбуйнейшых прадаўцоў адзення ў Расеі. Паводле словаў Расавай, калі гэтая адзнака будзе дасягнутая, яе кампаніі давядзецца перакласці валютныя выдаткі ў кошты, якія пакуль улічваюць старыя валютныя курсы.

З пачатку лістапада рубель страціў 7% да юаня, столькі сама да даляра і блізу 3% да еўра. Хваля дэвальвацыі накрыла рынак пасля 21 лістапада, калі ЗША абвясцілі пра новыя санкцыі супраць расейскага фінансавага сектару, уключыўшы ў «чорныя спісы» пяць дзясяткаў банкаў, у тым ліку дзяржаўны Газпрамбанк. ГПБ, які захоўваў доступ да сістэмы SWIFT і аперацый у еўрах, заставаўся адным з апошніх буйных банкаў, за кошт якіх расейская эканоміка атрымлівала плыню замежнай валюты. Пашырэнне санкцый «зрабіла ключавы ціск на рубель», адзначае аналітык «ТКБ Інвестмент Партнерс» Максім Гладкіх.

У Расеі ўзнік дэфіцыт валюты, на які накладваецца лішак рублёў, паколькі бюджэт у канцы года традыцыйна нарошчвае выдаткі, адзначае Іскандэр Луцко з інвесткампаніі Aigenis. Ён прагназуе рост даляра да 110 рублёў ужо ў снежні.

Новыя санкцыі будуць перашкаджаць вяртанню валютнай экспартнай выручкі экспарцёрам, гэта можа прыводзіць да дэфіцыту прапановы валюты на рынку, згодны Ягор Сусін, кіроўны дырэктар ГПБ Private Banking. У найбліжэйшыя месяцы рынку будзе не ставаць прыкладна $2-4 млрд валютнай прапановы штомесяц, ацэньвае ён: «Гэта можа прыводзіць да вельмі нестабільнай сітуацыі з ліквіднасцю на ўнутраным рынку… празмерным рухам курсу, як летам – восенню 2023 года».

Вяртанне рубля на мінімумы валютнай панікі першых тыдняў вайны, калі даляр падскокваў да 120 рублёў і вышэй, – толькі пытанне часу, мяркуе асноўны аналітык «Фінама» Аляксандр Патавін. Перспектывы ў рубля «не вясёлкавыя», мяркуе ён: пад канец года Мінфін значна нарасціць бюджэтныя выдаткі і свабодных рублёў на рынку стане яшчэ больш, а ЕЗ пачаў працу над 15-м пакетам санкцый супраць РФ – у яго могуць увайсці абмежаванні супраць расейскага ЗПГ, ценевага флоту, а таксама выкарыстання замежных тэхналогій.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com