Супрацоўнік Генштаба Грузіі звольніўся на знак пратэсту

Некалькі журналістаў сышлі з праўладнага тэлеканала.

На знак пратэсту супраць пастановы ўладаў у Тбілісі прыпыніць на 4 гады працэс еўраінтэграцыі са сваёй пасады ў Генштабе грузінскага Мінабароны звольніўся рэферэнт у пытаннях ЗША і Вялікай Брытаніі ў Сілах абароны Грузіі Раці Твалавадзэ. Пра гэта ён сам паведаміў у Facebook у ноч на суботу, 30 лістапада.

«28 лістапада 2024 года ўрад Грузіі свядома адмовіўся ад еўрапейскага шляху, адкрыта заявіўшы, што больш не ідзе за гістарычным імкненнем нашага народа інтэграваць Грузію ў Еўрапейскі Звяз. Гэтай пастановай партыя «Грузінская мара» здрадзіла нашай Канстытуцыі – артыкул 78 нашай Канстытуцыі абвяшчае, што інтэграцыя ў еўраатлантычныя інстытуты з'яўляецца ключавой мэтай нашай знешняй палітыкі», – напісаў Твалавадзэ, заклікаўшы ўсіх суграмадзянаў пратэставаць «супраць гэтай пастановы неканстытуцыйнага і нелегітымнага ўраду».

Раней больш за 40 супрацоўнікаў Мінабароны Грузіі выпусцілі заяву, у якой указалі, што застаюцца вернымі абавязальніцтвам, устаноўленым артыкулам 78 Канстытуцыі, і падкрэслілі важнасць супрацоўніцтва краіны з еўрапейскімі і еўраатлантычнымі структурамі, паведамляе «Нямецкая хваля».

Журналісты сыходзяць з праўладнага тэлеканала Rustavi2

Пратэстуючы супраць дзеянняў уладаў, сярод іншага супраць ужывання паліцыяй сілы пры разгоне дэманстрантаў, з працы на праўрадавым тэлеканале Rustavi2, паводле звестак мясцовых СМІ, звольніліся чатыры журналісты.

МУС Грузіі сцвярджае, што мітынг каля будынка парламента на праспекце Руставелі ў Тбілісі «перавысіў нормы, устаноўленыя законам аб сходах і дэманстрацыях», і што ў выніку дзеянняў дэманстрантаў пацярпелі 10 супрацоўнікаў паліцыі. Установа не ўдакладняе, колькі пратэстоўцаў пацярпелі ад гвалтоўных дзеянняў сілавікоў. Раней СМІ пісалі, што многія маніфестанты, а таксама журналісты, якія асвятлялі пратэсты, пацярпелі ад збіцця з боку паліцыі.

Падчас акцыі пратэсту ў Грузіі затрыманыя больш за 100 дэманстрантаў

Паводле звестак МУС, падчас другой ночы пратэстаў супраць адмовы ад курсу на ўступленне краіны ў Еўразвяз былі затрыманыя 107 чалавек. Паводле міністэрства, затрыманні праводзіліся паводле артыкулаў Кодэкса аб адміністрацыйных правапарушэннях аб непадпарадкаванні патрабаванням паліцыянтаў і аб дробным хуліганстве. Усяго за два дні пратэстаў, як паведамляецца, былі затрыманыя больш за 150 удзельнікаў акцыяў.

У акцыі ўдзельнічалі дзясяткі тысячаў чалавек. Спачатку асноўная маса пратэстоўцаў скандавала лозунгі ля будынка парламента, перакрыўшы цэнтральны праспект імя Шаты Руставелі, але потым сітуацыя абвастрылася. Мітынгоўцы сталі кідаць у паліцыянтаў петарды і бутэлькі з фарбай, стукаць падручнымі прадметамі ў браму будынка парламента і спрабавалі выламаць бакавую браму.

У адказ паліцыя ўжыла вадамёты і слезацечны газ і адціснула пратэстоўцаў ад будынка парламента. Рэшта на праспекце Руставелі стала ўзводзіць барыкады з лаваў і смеццевых бакаў.

Паводле паведамлення выдання Tabula, некалькі ўдзельнікаў акцыі сарвалі сцяг кіроўнай партыі з офіса «Грузінскай мары», разбілі вокны і ўварваліся ў памяшканне, размешчанае на праспекце Руставелі.

Паводле словаў прэзідэнткі Грузіі Саламэ Зурабішвілі, пратэставыя акцыі, акрамя Тбілісі, адбыліся і ў іншых буйных гарадах Грузіі, сярод іншага ў Батумі і Кутаісі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com