Лукашэнка нечакана замітусіўся

Адна з падзей можа стаць штуршком да паўстання супраць дыктатуры ў Беларусі.

Інаўгурацыя «Пуціна» 7 траўня азначае не проста працяг расейска-ўкраінскай вайны, а намер крамлёўцаў перавесці яе ў новую фазу. Таму рэзка замітусіўся Лукашэнка і пачаў расказваць, што NАТО з Літвы сабралася атакаваць яго дронамі, украінскія войскі сабраліся ў дзіцячай лякарні на паўночнай ускраіне Кіева, адкуль і ўварвуцца, а беларускія паўстанцы плануюць увайсці ў Кобрын і папрасіць «Байдэна, увесці войскі!».

Мітусня Лукашэнкі мае дзве аб'ектыўныя прычыны, якія ніяк ад яго не залежаць.

Прычына першая, чэрвеньскі саміт міру ў Швайцарыі з наступным прымусам РФ да міру мяркуе дэакупацыю не толькі Украіны, але і Беларусі. Пакуль у Беларусі знаходзяцца войскі РФ ні пра якія гарантыі бяспекі не толькі для Украіны, але таксама для Латвіі, Літвы і Польшчы казаць бессэнсоўна. Вывад іх з Беларусі можа стаць штуршком да паўстання супраць дыктатуры Лукашэнкі. Зразумела, ніхто не дае гарантый другой рэвалюцыйнай хвалі ў Беларусі адразу пасля сыходу рашыстаў. Але з улікам таго, што летам-восенню 2025 г. Лукашэнка мае прайсці працэдуру прэзідэнцкіх выбараў, а ён ужо ў лютым 2024 г. заявіў аб сваёй гатоўнасці да яе, то ў агульным кантэксце ўсё выглядае амаль адназначна.

Другая прычына - гэта ашалелыя крамлёўцы. Пастанова пакінуць брэнд "Пуцін" яшчэ на шэсць гадоў абавязвае іх ваяваць да поўнага распаду РФ або да яе ліквідацыі. На практыцы можа атрымацца два ў адным. Паводле логікі яны павінны шакавальна паваяваць да саміту ў Швайцарыі, каб паспрабаваць паўплываць на пазіцыю яго ўдзельнікаў. Ёсць яшчэ дзясятак іншых прычын, якія падштурхоўваюць іх да вайсковай актыўнасці. У выніку Лукашэнка ўжо будзе абавязаны ўдзельнічаць у вайне не толькі ў выглядзе плацдарма, склада і рамонтнай базы, але і непасрэдна войскамі, і афіцыйна, а не цішком як у 2022 г. Іншых варыянтаў у крамлёўцаў для яго проста няма праз геаграфію вайны і тых геапалітычных і ідэалагічных канструкцый, якія яны нагрувасцілі. Таму беларусы ўжо могуць развітвацца з ілюзіяй, што ім удасца адсядзецца па дамах, а не ў акопах. Лукашэнка такое развітанне зараз пачуў і хоча пацягнуць за сабой на той свет і астатніх.

Падабаецца ці не падабаецца гэта Лукашэнку, але ён абавязаны выконваць указанні Масквы і саскочыць ужо не можа. Таму і расказвае, адкуль па ім рыхтуюцца ўдары…

Сяргей Клімоўскі, «Фэйсбук»