Генерал-маёр СБУ: РФ можа падарваць знутры вялізны вулкан

Расея – нестабільная дзяржава, замяшаная на фобіях.

Прэзідэнт ЗША Дональд Трамп даручыў спецпрадстаўніку датычна Украіны генерал-лейтэнанту Кіту Келагу скончыць вайну Украіны з Расеяй за сто дзён.

Наколькі гэта рэальныя тэрміны? Пра гэта і не толькі сайт Charter97.org пагутарыў з экс-намеснікам кіраўніка Службы бяспекі Украіны, генерал-маёрам у запасе Віктарам Ягуном:

– Гэта ўвогуле нерэальныя тэрміны. Гэта генерал, а не дыпламат, і гэты генерал у дыпламатычнай працы ўвогуле не ўспрымаецца Расеяй як перамоўнік. Ён можа быць проста камунікатарам, не больш за тое.

Але праблема не ў гэтым. Праблема ў тым, што Расея не хоча. Расея не разумее, што ад яе хочуць, таму што ўсе ігнаруюць яе патрабаванні. Яны прапанавалі чатыры пункты, і гэтыя чатыры пункты настолькі абсурдныя, што іх нават абмяркоўваць ніхто не збіраецца. Таму спыніць вайну за 100 дзён – гэта прыкладна тое самае, што спыніць яе за 24 гадзіны.

– Мяркуючы з апошніх заяваў, Пуцін не збіраецца садзіцца за стол перамоваў. Якія інструменты ціску ёсць у Трампа?

– Інструментаў велізарная колькасць. Я думаю, што пасля таго, як усё зразумеюць, што Расея не збіраецца ісці ні на якія саступкі, нават на нейкія пэўныя кантакты, усё пойдзе зусім дрэнна для Расеі. Адкуль узяліся гэтыя 100 дзён: 100 дзён – гэта плюс-мінус 9 траўня. Гэта той дзень, які яны хочуць адзначаць – «дзень перамогі».

Яны ў гэтым ключы хочуць перамоваў, каб Украіна ўстала на калені. Як паставіць Украіну на калені? Я сабе гэтага проста не ўяўляю. Або як Украіне распусціць войска і сказаць, што «ўсё, мы не будзем змагацца, уся тэрыторыя ваша, рабіце, што хочаце». Ёсць моманты, якія проста не падлягаюць ніякаму абмеркаванню.

– Сёння шмат кажуць пра перамовы, але мала кажуць пра наступствы заканчэння вайны для Расеі. А гэта мільёны тых, хто прайшоў праз фронт, перавод эканомікі з ваеннай каляіны на звычайную. Якія працэсы могуць запусціцца ў Расеі?

– Расея – гэта дзяржава, створаная на хлусні і міфалогіі. Калі ты ўвесь час хлусіш свайму насельніцтву, напрыклад, што вайну пачаў Гітлер, узнікае пытанне: а што тады рабіў Савецкі Саюз разам з Гітлерам у Берасці ў 1939-м годзе? Што гэта за парад быў? Што гэта ўвогуле было? А што за дамоўленасці былі падпісаныя ў жніўні 1939 года паміж СССР і Нямеччынай? Гаварыце праўду.

Калі татальна хлусяць, гэта заўсёды выліваецца ў нейкія фантомныя моманты, якія час ад часу могуць прарвацца, як гэта адбылося ў канцы 80-х і ў 90-я гады. Цяпер у расейцаў крыху іншая сітуацыя, яны занадта накруцілі насельніцтва. Я чытаў адзін дакумент з пасяджэння Дзяржаўнай Думы Санкт-Пецярбурга, дзе абмяркоўваліся пытанні, звязаныя са знішчэннем бадзяжных сабак. І там чалавек на поўным сур'ёзе, прычым ніхто яго не спыніў, выступае і кажа, што калі вам хочацца кагосьці забіваць, то ідзіце ва Украіну і забівайце ўкраінцаў.

Узровень нянавісці да Украіны падняўся да такой ступені, што ўкраінцы – гэта ўжо нішто, а бадзяжных сабак трэба ахоўваць. На гэтым фоне рэзка перайсці да іншага стану ім будзе вельмі складана. Гэты масіў можа ў нейкі момант заваліцца. І нехта спытае: «Пачакайце, а што было перад гэтым? Як, мы не перамаглі, мы не знішчылі Украіну? Хто перамог? Мы перамаглі ці яны перамаглі?»

Можа ўзнікнуць не сацыяльны выбух, але як мінімум нейкі недавер да ўлады. А калі ёсць недавер да ўлады, калі ўлада не можа кіраваць усім працэсам, могуць з'явіцца крайнія сілы, якія скажуць: «Мы можам па-іншаму, мы можам давесці ўсё да канца, а давайце падумаем, можа, нам час мяняць нашага лідара». Гэтыя моманты звязаныя не з дэмакратычнымі зменамі, а са зменамі зусім іншага кірунку.

Таму нейкія сацыяльныя выбухі ў Расеі могуць адбыцца, асабліва на фоне эканомікі, збяднення і разбурэння камунальнай гаспадаркі. Расейцы гавораць, што будуць замарожваць Еўропу, а на самай справе замарожваюць сябе. Будзе вялізная колькасць людзей, якія прыйдуць і запатрабуюць кампенсацыі за ўдзел у незразумелай вайне. І пачнуцца такія рэчы, як «мы вас туды не пасылалі, чаму вы атрымалі грошы, а мы не атрымалі, вы там зарабілі іх незаслужана».

Я думаю, што гэта ўсё – маленькія выбуховыя фантанчыкі, якія могуць аб'яднацца ў адзін вялізны вулкан, які падарве ўсе знутры. Чым гэта ўсё скончыцца для Расеі – гэта ўжо яе праблема. Гэта нестабільная дзяржава, замяшаная на шматлікіх фобіях.

Калі з боку паглядзець на так званыя «расейскія скрэпы» на фоне велізарнай колькасці мігрантаў розных нацыянальнасцяў і рэлігій, пры гэтым беручы да ўвагі, што праваслаўныя даўно не складаюць большасці ў Расеі, то гэта можа мець вынікі для іх. Нейкія рэзкія рухі я ім вельмі не раіў бы рабіць. Хоць для мяне – чым горш у Расеі, тым лепш для мяне, для нас усіх ва Украіне.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com