У Гародні паказалі новыя аўтобусы, якія будуць працаваць на менскім кірунку

«Кітайцы» выцясняюць айчынныя МАЗы.

Гарадзенскія перавознікі пачалі замяняць маршруткі еўрапейскіх вытворцаў на аўтобусы кітайскага аўтапраму, паведаміла прэс-служба Міжрэгіянальнай асацыяцыі перавознікаў (МАП).

Шэсць новых аўтобусаў Zhongtong будуць працаваць на маршрутах «Гародня-Менск» і «Слонім-Менск».

«Усяго ж перавознікі для гэтых кірункаў набылі больш за 10 аўтобусаў. Памер інвестыцый перавысіў 1,5 млн даляраў», – адзначылі ў асацыяцыі.

Чаму для перавозкі пасажыраў была набытая тэхніка кітайскага вытворцы, а не беларускія МАЗы, у публікацыі МАП не ўдакладняецца.

Як расказаў дырэктар кампаніі-перавозніка Аляксей Сыты, цяпер на міжгародніх рэйсах у асноўным выкарыстоўваюцца мікрааўтобусы маркі Mercedes і Volkswagen – гэта знаёмыя шматлікім «спрынтары» і «крафцёры», якія шмат гадоў былі лідарамі на рынку камерцыйнага транспарту ў краіне.

Тэхніка актыўна эксплуатуецца кожны дзень, таму з часам узнікла неабходнасць абнаўлення аўтапарку.

«Магчымасці замяніць транспарт на той самы мадэльны шэраг у нас няма. Да таго ж кошт у іх занадта высокі», – адзначыў Сыты.

Паводле словаў суразмоўцы, да кітайскага аўтапраму яны доўга прыглядаліся, вывучалі розныя варыянты і знайшлі прымальны. Ацэньвалі не толькі тэхнічныя характарыстыкі транспарту, але і той факт, каб у Беларусі была магчымасць сэрвіснага абслугоўвання.

Фірма ўжо два гады выкарыстоўвае аўтобус кітайскага вытворцы на міжнародным кірунку. Прызнаюцца, што пакуль нараканняў на якасць не было, рамонт таксама не патрабаваўся, прабег у яго большы за 200 тысячаў кіламетраў. Набытыя ў пачатку года аўтобусы – таксама спробная партыя. Яны будуць выкарыстоўвацца ў больш інтэнсіўным рэжыме і праязджаць за месяц прыкладна 36 тысячаў кіламетраў ці больш за 400 тысячаў кіламетраў за год.

Прадстаўнікі кампаній-перавозніцаў упэўненыя, што калі новая тэхніка зарэкамендуе сябе з добрага боку, то астатнія камерцыйныя і дзяржаўныя перавознікі таксама стануць больш актыўна замяняць «еўрапейцаў» на «кітайцаў».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com