Сяргей Дылеўскі: Офіс Ціханоўскай ведаў аб хвалі COVID, але не падтрымаў нас

Няёмкая праўда пра страйк 2021-га года.

«Кіберпартызанам» удалося здабыць базы звестак па ўсіх памерлых грамадзянах Беларусі. Як выявілася, COVID-19 забраў 90 тысяч жыццяў, а не 7 тысяч, як сцвярджалі ўлады. І гэта больш, чым афіцыйныя ваенныя страты Украіны сёння.

Самымі цяжкімі ў 2021-м годзе былі кастрычнік і лістапад. Тады штомесяц памірала на 10-12 тысяч людзей больш, чым звычайна. Менавіта 1 лістапада 2021 года Беларускае аб'яднанне працоўных абвясціла страйк, заклікала людзей заставацца дома.

Ці можна было выратаваць больш людзей? Чаму офіс Ціханоўскай не падтрымаў гэтую ініцыятыву?

Сайт Charter97.org паразмаўляў з лідарам Беларускага аб'яднання працоўных, сябрам прэзідыума першай каардынацыйнай рады апазіцыі Сяргеем Дылеўскім:

- У нас былі выразныя звесткі з заводаў, што менавіта гэта і адбываецца, што людзі насамрэч паміраюць. Смяротнасць і захворванне былі вялізнымі.

Тады ніхто не верыў, а сёння гэтыя звесткі пацвердзілі «Кіберпртызаны». Наколькі я зараз памятаю, інфармацыя з месцаў тады паступала такая, што ад 10 да 15% работнікаў, калі браць абагульненыя звесткі, знаходзіліся на бальнічным. Амаль 10-15% хварэлі і былі ў дастаткова цяжкім стане, але былі вымушаныя выходзіць на працу, бо ўлады не прызнавалі каранавірус і не абвяшччалі каранцін.

Мы тады маніторылі сітуацыю і разумелі, да чаго ўсё ідзе. Былі і палітычныя мэты, на хвалі пратэстаў мы заклікалі людзей абвяшчаць забастоўкі, неяк бунтаваць супраць рэжыму. Але мы таксама бачылі звесткі аб захворванні і разумелі, што людзі проста гінуць ні за што, і гэта не атрымлівае належнай агалоскі.

З тэлевізараў тады гаварылася, што на прадпрыемствах з захворваннем COVID-19 усё ў парадку , а на справе адбывалася з дакладнасцю да наадварот. Менавіта таму мы заклікалі людзей заставацца дома, засцерагчы сябе і не выходзіць на працу, груба кажучы, у рассаднік заразы. Нам удалося тады выратаваць ад смерці тысячы людзей.

- Офіс Святланы Ціханоўскай у той момант не падтрымаў заклік заставацца дома. Чаму? Вы з імі размаўлялі, даносілі пазіцыю па неабходнасці ратаваць людзей ад COVID-19?

— Так, мы размаўлялі на гэтую тэму, былі нейкія размовы праз тэлефон, мы спрабавалі кантактаваць з імі, спрабавалі растлумачыць усю сітуацыю. Адказ заўсёды быў адзін - «людзі не гатовыя, людзі не хочуць».

Я не ведаю, ці валодалі яны хоць нейкай інфармацыяй на гэтую тэму, але мы спрабавалі данесці сваю інсайдэрскую інфармацыю. Мы распаўсюджвалі статыстыку аб захворванні і распавядалі аб тым, наколькі небяспечна знаходзіцца на працоўных месцах ва ўмовах пандэміі, не тое што па прадпрыемствах, а абсалютна ўсюды. Мы падкрэслівалі, наколькі важна было тады людзям застацца дома, але ні офіс, ні сама Ціханоўская нас не падтрымалі.

- Вас не падтрымалі ў 2021-м годзе. У жніўні 2020-га года, калі на знак пратэсту супраць рэпрэсій стыхійна забаставалі прадпрыемствы па ўсёй краіне, з'яўляліся страйкамы на найбуйнейшых заводах, ні ад Ціханаўскай, ні ад яе акружэння не было закліку да стачкі. Былі толькі нядзельныя мітынгі. Чаму ніхто з палітычных лідараў, якія заставаліся на волі, не заклікаў да забастоўкі?

- Шчыра кажучы, Ціханоўская не разумела, што адбываецца. Тады здавалася, што перадвыбарчы штаб проста плыў па цячэнні. Мы арганізавалі страйкамы, па гарадах пайшлі мітынгі страйкоўцаў, але ніякай дапамогі мы не атрымлівалі. Яны не былі супраць, проста ўхвалялі.

Чаму не быў на гэта зроблены нейкі большы націск, большы акцэнт? Мусіць, гэта трэба спытаць у іх, а не ў мяне.

- Ці маглі падзеі пайсці інакш?

- Вядома, маглі б. Тады была магчымасць карэнным чынам змяніць ход рэвалюцыі 2020 года.

- Да забастоўкі Ціханоўская заклікала толькі 26 кастрычніка. Занадта позна?

- Ну, вядома, час быў ужо страчаны. Нават калі меркаваць па маёй сітуацыі - мяне затрымалі яшчэ ў жніўні, калі мы выйшлі і пачалі арганізоўваць гэтыя самыя забастоўкі. Пасля, груба кажучы, да 26 кастрычніка я сядзеў у турме. Большасць людзей, якія страйкавалі разам са мной і арганізоўвалі страйкамы, былі таксама арыштаваныя.

Але тады штаб з гэтым нічога не зрабіў. Самі ведаеце, незаменных людзей няма, але чамусьці яны стушаваліся, было нешта з разраду «значыць, трэба ціхенька сядзець, роўна паводзіць сябе, не высоўвацца». Калі б была прынятая іншая пастанова з іх боку, я думаю, людзі б падтрымалі.

- Як вы думаеце, ці можна будзе выкарыстоўваць забастоўку як інструмент пратэсту ў будучыні?

- Страйк заўсёды быў, ёсць і будзе адным з найважнейшых інструментаў пратэсту. З усякім рэжымам. Абсалютна з усякім. Таму што нават калі меркаваць па цяперашняй сітуацыі, з навін з Беларусі, то зараз гэты лядашчы дзед Лукашэнка сутаргава ездзіць па ўсіх прадпрыемствах, спрабуе неяк ці нагнаць упушчанае, ці спрабуе паказаць, што ж рабочыя з ім, хоць гэта абсалютна не так.

Мы бачым нават па вось гэтых рэжымных нейкіх відэа, якія з'яўляюцца ў інтэрнэце, што паказваюць адны і тыя ж твары. Але ўсё адно ён працягвае ездзіць па заводах, каб зляпіць хоць нейкую бачнасць падтрымкі з боку працоўных. Але ўсе і так ведаюць, як на заводах ставяцца да Лукашэнкі. Калі сёння працоўныя выйдуць ізноў на забастоўкі, то рэжым гэтага не перажыве.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com