Браты Джонасы здымуцца ў калядным фільме для Disney

Папулярныя музыкі і акторы з самага дзяцінства мільгаюць на тэлеэкранах.

Амерыканскі поп-рок-гурт у складзе трох братоў Кевіна Джонаса, Джо Джонаса і Ніка Джонаса рыхтуецца зноў вярнуцца на экраны Disney з калядным фільмам, паведамляе The Hollywood Reporter.

Святочная камедыйная карціна атрымала працоўную назву Jonas Brothers Christmas Movie і выйдзе на платформе стрымінгавага сэрвісу Disney+.

Браты, паводле сюжэту, згуляюць саміх сябе. Героі цягам усяго фільма будуць пераадольваць мноства перашкодаў, каб перабрацца з Лондана ў Нью-Ёрк і сустрэць Каляды са сваімі блізкімі.

У гонар будучай прэм'еры стваральнікі выпусцілі і невялікі промаролік. У ім браты паведамляюць пра падрыхтоўку прэм'еры, якая адбудзецца ўжо ў наступны святочны сезон.

Таму зноў убачыць папулярнае трыа на экранах Disney+ гледачы змогуць у канцы 2025 года.

Амерыканскі музычны калектыў з трох братоў Кевіна, Джо і Ніка склаўся ў 2005 годзе і атрымаў назву Jonas Brothers. На сёння іх музычная кар'ера ўключае пяць студыйных альбомаў.

Акрамя таго, разам яны не раз з'яўляліся на тэлеэкранах у якасці актораў, прычым часцей за ўсё ў ролях саміх сябе.

Так, дэбют Jonas Brothers на канале Disney адбыўся ў 2007 годзе, калі яны разам з Майлі Сайрус выканалі ролі ў падлеткавым серыяле «Ханна Мантана».

Акторская кар'ера музыкаў не абышлася і без поўнаметражных фільмаў. Першай працай у поўным метры для іх стала моладзевая карціна з Дэмі Лаваці «Camp Rock: Музычныя вакацыі».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com