ААЭ паабяцалі інвеставаць у Італію $40 млрд

Інвестыцыі будуць сканцэнтраваныя на ШІ, энэргетыцы і рэдказямельных элементах.

Аб'яднаныя Арабскія Эміраты інвестуюць у Італію $40 млрд. Пра гэта пасля першага ў гісторыі візіту ў Рым прэзідэнта ААЭ паведаміла прэм'ер-міністарка Італіі Джорджа Мелані.

«Сёння вельмі важны дзень, яшчэ адзін адпраўны пункт у нашых двухбаковых стасунках. Гэта ператворыць, здавалася б, далёкіх партнёраў з патэнцыйна разбежнымі інтарэсамі на партнёраў, якія пастановяць падзяліць вельмі важную частку свайго шляху разам», – цытуе Мелані агенцтва Bloomberg.

Запланаваныя інвестыцыі будуць сканцэнтраваныя, сярод іншага, на штучным інтэлекце, цэнтрах апрацоўкі звестак, аднаўляльных крыніцах энэргіі і рэдказямельных элементах.

Мелані таксама згадала пра абвешчаную ў студзені супольную ініцыятыву Італіі, Албаніі і ААЭ ў транспартаванні электраэнэргіі па падводным кабелі ў Адрыятыцы. Кошт угоды ацэньваецца на 1 млрд еўраў.

Акрамя таго, згодна з супольнай заявай, Італія і ААЭ будуць супрацоўнічаць у галіне абароны і бяспекі.

Як удакладніла Reuters, пасля сустрэчы Мелані і Мухамеда бен Заіда Аль Нахаяна было абвешчана пра падпісанне больш як 40 новых пагадненняў. У іх задзейнічаныя буйныя італьянскія кампаніі, такія як энэргетычная група Eni, самы буйны італьянскі банк Intesa SanPaolo, аператар сувязі Telecom Italia, вытворца зброі Leonardo.

Як адзначае агенцтва, з моманту ўступлення на пасаду прэм'еркі ў 2022 годзе Мелані імкнецца ўмацаваць сувязі Італіі з краінамі Персідскага заліва, ігнаруючы занепакоенасць наконт праблемаў з правамі чалавека, якую выказваюць палітычныя апаненты. Пад яе кіраўніцтвам Італія зняла эмбарга на продаж зброі ААЭ і Саудаўскай Аравіі, уведзенае папярэднімі ўрадамі праз вайну ў Емене.

У студзені Мелані падпісала пагадненне пра ўмацаванне стратэгічнага партнёрства з Саудаўскай Аравіяй, што суправаджалася справавымі пагадненнямі памерам блізу $10 млрд.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com