«Людзям падабаецца, дзякуюць за пазітыў, хваляць рэпертуар»

Кандуктар з Магілёва расказаў пра свае канцэрты ў аўтобусе.

У TikTok вірусуецца ролік, зняты ў адным з тралейбусаў Магілёва. Мужчына з бэйджам кандуктара эмацыйна спявае «Белыя ружы» пад уключаны на тэлефоне мінус і відавочна не саромеецца камеры.

Пасажыры рэагуюць з усмешкай, але ўсё ж крыху насцярожана: ну, што рабіць, не прынята ў беларусаў весяліцца пры ўсіх нават у сонечны вясновы дзень. Ды яшчэ і ў форме працаўніка афіцыйнай установы. Кандуктар тым часам ззяе ўсмешкай і, прытанцоўваючы, ходзіць па салоне, піша «Анлайнер».

Невядома, што прымусіла мужчыну зладзіць спантанны сеанс караоке ў грамадскім транспарце. Але, мяркуючы з дзясяткаў каментароў мясцовых жыхароў, падобнае ён робіць не ўпершыню. Магіляўчане пішуць, маўляў, не раз ужо ездзілі з ім у адным салоне і кожны раз выходзілі на сваім прыпынку з прыўзнятым настроем, а яшчэ просяць аўтапарк выпісаць пазітыўнаму супрацоўніку прэмію.

«Нам бы ў Менск яго, а то ўсе кантралёры тут ходзяць панурыя», – напісаў хтосьці і такое. Што ж, чакаем на гастролях у «сотцы».

Праз некалькі дзён пасля таго, як ролік з кандуктарам, які спявае, разляцеўся ў сацсетках, мужчыну адшукалі журналісты выдання «Магілёў. Анлайн». Героя TikTok клічуць Віктар, яму 50 гадоў. Прадаваць квіткі пасажырам ён пачаў пару гадоў таму і спачатку, што дзіўна, нават саромеўся новай прафесіі – цяпер так і не скажаш.

– Пасля скарачэння з іншай працы трэба было за нешта жыць, неяк зарабляць. Пайшоў у кандуктары. Скажу шчыра: адразу было крыху сорамна, баяўся, што на мяне паглядзяць неяк не з таго боку, не так зразумеюць. Было некамфортна. Але затое цяпер я самы камфортны чалавек.

Наконт імправізаваных канцэртаў на працы, расказвае Віктар, прэтэнзій ад кіраўніцтва аўтапарку не было – наадварот, усе хваляць і падтрымліваюць. А вось ад пасажыраў негатыў часам сустракаецца. Але кандуктар рэагуе на яго спакойна: просяць выключыць музыку – выключае.

– Але такое бывае рэдка. Найчасцей людзям падабаецца, дзякуюць за пазітыў, хваляць рэпертуар. Вельмі многія пасажыры заходзяць у салон і адразу вітаюцца, пазнаюць. Ну не тое што пазнаюць, гэта мы проста сябруем усім горадам, калі так разабрацца.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com