«У працоўную кніжку яны могуць пісаць усё што хочаш»

Беларуска ўзяла ў ФСАН даведку і выявіла, што працадаўца яе дужа падвёў.

Аксана (імя змененае) у апошнія гады жыве з сям'ёй у Польшчы. Пры налічэнні пенсіі ў гэтай краіне ўлічваецца працоўны стаж у Беларусі. Таму падчас апошняй паездкі на радзіму яна звярнулася ў Фонд сацабароны насельніцтва (ФСАН) па адпаведную даведку. Так і высветліла, што адзін з менскіх працадаўцаў не выплачваў за яе сацыяльныя ўнёскі. Сваёй гісторыяй яна падзялілася з MOST.

Аксана прызнаецца, што да пенсіі ёй яшчэ далёка, але пра яе беларуска ўжо задумваецца.

З 1 красавіка 2022 года набыў моц дамова паміж Польшчай і Беларуссю аб сацыяльным забеспячэнні. У адпаведнасці з дакументам беларускі стаж залічваецца ў агульны працоўны стаж пры афармленні пенсіі ў Польшчы.

Калі прыйдзе час афармляць пенсію ў Польшчы, для пацвярджэння беларускага стажу спатрэбіцца даведка з ФСАН. Аксана кажа, што працоўную дзейнасць у Беларусі яна ўжо закончыла, зараз плануе працаваць толькі ў Польшчы. Таму выпіску ў фондзе надумала замовіць ужо зараз, "пакуль у правілах выдачы нічога не змянілася".

Дакумент жанчына атрымала без праблем, а потым зверыла яго з запісамі ў сваёй працоўнай кніжцы. І выявіла, што ў даведцы з ФСАН не стае аднаго працадаўцы, у якога Аксана працавала ў 2006-2007 гадах.

У той момант жанчына была ўпэўнена, што працуе афіцыйна. У працоўнай кніжцы быў запіс аб прыёме на працу, стаяла круглая пячатка арганізацыі. Але, як высветлілася, працадаўца не падаваў пра яе звесткі у ФСАН: не запаўняў формы персаніфікаванага ўліку ПУ-3 (аб даходах і страхавых унёсках работніка) і ПУ-2 (аб прыёме і звальненні супрацоўніка). Таму гэты час выпаў з працоўнага стажу.

"У працоўную кніжку яны могуць пісаць усё што хочаш"

Аксана надумала высветліць, як так выйшла. Хаця прайшло амаль 20 гадоў, яна стала шукаць арганізацыю, дзе працавала. Высветлілася, ужо шмат гадоў яна знаходзіцца ў стадыі ліквідацыі.

Асабістых кантактаў былых калег у беларускі не было. Але яна памятала, што ў той час шмат тэлефанавала свайму кіраўніку. Таму жанчына запытала ў мабільнага аператара раздрукоўку званкоў, каб вылічыць нумар мужчыны і паспрабаваць звязацца з ім. Пакуль адказу на яе запыт няма. І беларуска мяркуе, што праз столькі гадоў звесткі ў аператара ўжо не захаваліся. Ды і кіраўнік мог змяніць нумар тэлефона.

- Мне пашанцавала: я прапрацавала там да шасці месяцаў. Мяне цешыць, што гэта не так шмат. А нейкі супрацоўнік, магчыма, працаваў у гэтай кампаніі год, два, тры, - апісвае Аксана магчымыя цяжкасці былых калег.

Адной з іх можа стаць сваячка жанчыны. Яна працавала ў той самай фірме. Аксана ўжо папярэдзіла яе аб магчымых праблемах, так што жанчына таксама хоча зрабіць запыт у ФСАН.

- Кожнаму, хто працуе ў Беларусі, лепш правяраць, ці плаціць працадаўца за іх падаткі. Бо ў працоўную кніжку яны могуць пісаць усё што хочаш. Але фактычна не падаюць ніякіх звестак і не плацяць унёскаў за працаўнікоў. І гэты стаж ніяк не будзе ўлічвацца ў далейшым у пенсіі, - папярэджвае Аксана.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com