Пуцін адпраўляе перамоўнікаў у Вашынгтон пасля расчаравання Трампа Крамлём
2- 2.04.2025, 9:30
- 7,382
Гэта першы візіт высокапастаўленага прадстаўніка РФ у Вашынгтон пасля пачатку вайны.
Кіраўнік Расейскага фонду прамых інвестыцый (РФПІ) Кірыл Дзмітрыеў, якога прэзідэнт РФ Уладзімір Пуцін прызначыў адным з перамоўнікаў з ЗША аб Украіне, на гэтым тыдні адправіцца ў Вашынгтон, каб сустрэцца з пасланцам амерыканскага прэзідэнта Стывам Уіткафам, паведамілі CNN дасведчаныя крыніцы.
З іх слоў, перамовы будуць прысвечаныя ўмацаванню стасункаў паміж Масквой і Вашынгтонам і імкненню пакласці канец вайне ва Украіне.
Паездка Дзмітрыева стане першым візітам высокапастаўленага прадстаўніка Расеі ў Вашынгтон пасля пачатку вайсковага канфлікту. Для гэтага амерыканскія ўлады часова знялі санкцыі з Дзмітрыева, пад якімі ён знаходзіцца з лютага 2022 года, і выдалі яму візу, адзначылі суразмоўцы тэлеканала.
Пасля публікацыі CNN аб будучым візіце ў ЗША кіраўнік РФПІ напісаў у сацсетцы Х аб «супраціве дыялогу» паміж Масквой і Вашынгтонам, што «абумоўленае ўкаранелымі інтарэсамі і старымі наратывамі».
«Але што калі паляпшэнне стасункаў - гэта менавіта тое, што трэба свету для ўстойлівай глабальнай бяспекі і міру?» - задаўся пытаннем Дзмітрыеў.
Да гэтага кіраўнік РФПІ ўваходзіў у склад расейскай дэлегацыі на першых з пачатку вайны перамовах з ЗША, якія прайшлі 18 лютага ў сталіцы Савудаўскай Арабіі Эр-Рыядзе. На сустрэчы ён адказваў за інвестыцыйна-эканамічны блок і заявіў, што амерыканскі бізнэс страціў $300 млрд у выніку сыходу з расейскага рынку. Дзмітрыеў адправіцца ў ЗША на фоне паведамленняў аб тым, што прэзідэнт Дональд Трамп «расчараваны» Пуціным праз зацягванне перамоў аб усёабдымным спыненні агню ва Украіне і можа ўвесці новыя санкцыі.
Са слоў крыніц Reuters, у адміністрацыі Трампа прыйшлі да высновы, што ўкладаць мірнае пагадненне аб Украіне «найбліжэйшыя месяцы» не атрымаецца. У сувязі з гэтым Белы дом распрацоўвае новыя механізмы ціску як на Маскву, так і на Кіеў.
Са звестак Fox News, Трамп разглядае магчымасць увядзення жорсткіх санкцый супраць расейскага «ценявога флоту», які дазваляе Маскве абыходзіць абмежаванні на экспарт нафты. Акрамя таго, як піша Reuters, амерыканскія ўлады абмяркоўваюць і іншыя эканамічныя і дыпламатычныя меры, якія могуць прымусіць Расею перагледзець сваю пазіцыю аб Украіне.
30 сакавіка Трамп заявіў тэлеканалу NBC, што быў «вельмі злы» і «раз'юшаны» праз тое, што Пуцін паставіў пад сумнеў легітымнасць прэзідэнта Украіны Уладзіміра Зяленскага. Трамп прыстрашыў Маскву ўвесці 25-адсоткавыя другасныя мыты на экспарт расейскай нафты, калі з віны Крамля пагадненне аб спыненні агню з Кіевам не будзе ўкладзенае цягам месяца.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
