Асцярожна, дзверы зачыняюцца

Да закрыцця доступу да інфармацыі беларусам не звыкаць.

З пандэміі ковіда ўсё не тое каб пачалося, але пагоршылася. Нараджальнасць, смяротнасць, экспарт і імпарт спачатку па асобных пазіцыях, потым - татальна. Цяпер вось закрылі магчымасць атрымаць онлайн інфармацыю аб забароне на выезд з Беларусі. І ўсё больш старанна ўлада надумалі хаваць рэпрэсіі. І ўвогуле ўсе праблемы, нават з якасцю бульбы. Каб у вочы не кідаліся, піша planbmedia.

Асцярожна, дзверы зачыняюцца

Раней у асабістым кабінеце на сайце МУС у раздзеле фізічных асоб можна было праверыць неаплачаныя штрафы ДАІ і абмежаванні на выезд з Беларусі. Цяпер, як заўважыла "Медыязона", гэтай опцыі на сайце няма. А была яна вельмі папулярнай. У тым ліку ў нелаяльных. Практычна ўсе, хто пакідаў краіну "праз палітыку", "прабівалі" сябе па сайце, каб выбраць бяспечны спосаб перасекчы мяжу.

Цяпер беларусы могуць праверыць, ці ёсць абмежаванне на выезд з краіны, толькі пры асабістым звароце ў аддзел грамадзянства і міграцыі РУУС па месцы рэгістрацыі ці фактычнага пражывання.

А яшчэ ад беларусаў і не толькі закрылі інфармацыю пра расклад судовых працэсаў на сайце Вярхоўнага суда. З 5 сакавіка, піша «Радыё Свабода», на сайце ідуць «рэгламентныя працы». Інфармацыя недаступная.

Паводле раскладу пасяджэнняў судоў можна было даведацца дату пасяджэння, прозвішчы падсудных і інкрымінаваныя ім артыкулы. Ва ўмовах, калі плынь рэпрэсій расла і шырылася, гэта часта было адзінай магчымасцю ацаніць маштаб пераследу і даведацца пра ахвяр. Да з'яўлення прозвішча ў раскладзе часта было невядома пра пераслед і затрыманне гэтага чалавека.

Акрамя таго, на сайце недаступны раздзел "спецыяльная вытворчасць". Там публікавалі інфармацыю пра завочныя суды над тымі, хто пакінуў Беларусь. У тым ліку - пра прысуды.

Менш ведаеш, лепей спіш

Зрэшты, эзопава мова і мудрагелістыя схемы замоўчвання - даўняя практыка беларускіх уладаў, запазычаная яшчэ ў Саюзе. Вось піша прэса (не ўцякачка, а цалкам свая) пра асартымент бульбы ў крамах. І выходзіць, што бульбачка - ці дужа дарагая, ці вельмі дрэнная - зморшчаная, з цвіллю, гніллю. Тут і адрасы, і крамы, і незадаволеныя пакупнікі - добры рэпартаж, жыццёвы.

Чыноўнікі праблему адмаўляюць. «Ёсць практычна ва ўсіх!» (крамах) - пішуць яны з клічнікам. Калі падрабязней, то ў 3% аб'ектаў бульба адсутнічала (аўтамабіль з прадукцыяй быў у дарозе, тавар быў вернуты пастаўшчыку з прычыны нізкай якасці і г.д.). У 10 адсоткаў аб'ектаў да рэалізацыі прапаноўвалася бульба, якая не адпавядае патрабаванням заканадаўства, канстатуюць у міністэрстве. І тут жа прызнаюцца, што патрабаванні гэтыя вельмі сціплыя.

Нельга прадаваць клубні з механічнымі пашкоджаннямі (парэзы, расколіны, увагнутасці) глыбінёй больш за 4 мм і даўжынёй больш за 10 мм; пашкоджаную шолудзямі, аспарозам на плошчы больш за 1/4 паверхні клубня; пашкоджаную драцянікам (больш аднаго ходу). Не дапускаецца наяўнасць клубняў, пазелянелых на больш як на 1/4 паверхні, пашкоджаных грызунамі, падмарожаных, запараных, з прыкметамі «удушша», клубняў раздушаных, паловак і частак клубня, пашкоджанай гнілатой і фітафторай.

Гэта значыць розніца паміж таварнай бульбай, за якую мы гатовыя заплаціць у краме, і стандартам для бульбы, злёгку пакамечанай і пазелянелай, але ў межах нормы, - відавочная.

Запыты беларусаў і магчымасці ўладаў іх задавальняць разыходзяцца. «У нас жа сёння ў сховішчах ёсць больш за 17 тысяч тон бульбы, і яе хопіць да канца міжсезоннага перыяду. Таму сказаць, што праблема, не. Так, якасць недзе кульгае», - канстатавала начальніца аддзела каардынацыі кантрольнай дзейнасці МАРГ Ірына Мурончык.

Кепская якасць - і ёсць праблема! Але ўладзе зручна інфармаваць беларусаў не пра якасць, а пра тое, што запасы бульбы ў стабілізацыйных фондах складаюць 116% ад плана.

Так што схема, калі народ задае пытанні, а ўлада дае адказы больш не працуе. І на пытанні, і на адказы зараз манаполія.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com