Чэхія абвінаваціла беларуску з АГП у працы на выведку РФ

Яе выправадзяць з краіны.

У Чэхіі былую беларускую журналістку Наталлю Судлянкову (Шаўко) унеслі ў нацыянальны санкцыйны спіс. Пра гэта паведаміла Служба інфармацыйнай бяспекі Чэхіі (BIS), зазначыла «Радыё Свабода». Раней Судлянкова атрымала ў Чэхіі прытулак, але зараз яна павінна пакінуць краіну на працягу 30 дзён.

Чэшскі ўрад дадаў беларускую журналістку Наталлю Судлянкову і супрацоўніка Галоўнай выведвальнай управы (ГРУ) РФ Аляксея Шаўрова ў нацыянальны санкцыйны спіс.

Са слоў міністра замежных спраў Чэхіі Яна Ліпаўскага, якога цытуе Seznam Zpravy, Судлянкова з'яўляецца ключавой супрацоўніцай расейскай ваеннай выведкі і на працягу многіх гадоў таемна і свядома працавала на некалькі расейскіх арганізацый у Чэшскай Рэспубліцы.

Прэм'ер-міністр Петр Фіяла заявіў, што, з высновы BIS, Судлянкова выконвала аперацыі ГРУ ў Чэхіі на заданні, якія паступалі з Масквы, а кіраваў ёю Шаўроў.

"Абедзве гэтыя асобы нясуць рызыку і нават пагрозу бяспецы нашай краіны", – падае словы Фіялы Seznam Zpravy.

Паводле звестак чэшскай спецслужбы, апроч ГРУ, Судлянкова супрацоўнічала з расейскай карпарацыяй «Расатам», Фондам падтрымкі і абароны правоў суайчыннікаў, мела дачыненне да грамадскай арганізацыі «Бяссмертны полк».

«Яе дзейнасць фінансавалася наўпрост з Расеі. За апошнія гады ёй заплацілі дзясяткі тысяч еўраў ў крыптавалюце», - цытуе Ліпаўскага Seznam Zpravy.

Акрамя гэтага, як паведамляецца, Судлянкова па даручэнні ГРУ арганізавала публікацыю некалькіх артыкулаў у чэшскіх СМІ і ажыццяўляла дзейнасць на карысць расейскага алігарха Алішэра Усманава, які знаходзіцца пад санкцыямі, што таксама стала прычынай уключэння яе ў спіс.

У снежні 1999 года Наталля Судлянкова атрымала прытулак у Чэшскай Рэспубліцы, але, паводле слоў міністра ўнутраных спраў Віта Ракушана, цяпер ёй давядзецца пакінуць краіну на працягу 30 дзён.

Паводле інфармацыі Respekt, Шаўроў зараз знаходзіцца ў Расейскай Федэрацыі.

У Чэхіі Судлянкова працавала галоўнай рэдактаркай "Пражскага тэлеграфа" - расейскамоўнага штотыднёвіка, які выдаваўся ў Празе. У мінулым яна таксама супрацоўнічала з Радыё Свабодная Еўропа/Радыё Свабода і з часопісамі Týden і Lidové noviny.

Палітычны прытулак Наталля Судлянкова атрымала праз пераслед у Беларусі, дзе балатавалася ў «парламент» ад Аб'яднанай грамадзянскай партыі, а таксама абвінавачвалася ў фінансавых злачынствах. У адным з інтэрв'ю чэшскай тэлевізіі ў 2011 годзе Судлянкова казала, што ў яе нібыта «былі некаторыя праблемы» з Лукашэнкам і людзьмі з ягонай каманды.

У 2001 годзе яе затрымалі на чэска-нямецкай мяжы на падставе міжнароднага крымінальнага ордэру, выдадзенага ўрадам Беларусі. Але чэшскі суд адхіліў запыт Менска, палічыўшы абвінавачанні супраць Судлянковай неабгрунтаванымі.

Уключэнне ў нацыянальны санкцыйны спіс азначае, што адпаведным асобам забаронены ўезд і знаходжанне ў Чэшскай Рэспубліцы, а таксама ўсе фінансавыя аперацыі праз чэшскія арганізацыі і замарожваюцца ўсе актывы ў краіне.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com