Кіраўніцтва МУС Нямеччыны вывучае шляхі вяртання сірыйцаў дадому

В.а. міністра ўнутраных справаў ФРГ наведаў Дамаск.

Выканаўца абавязкаў міністра ўнутраных справаў Нямеччыны Нэнсі Фэзэр (Nancy Faeser) і кіраўнік МУС Аўстрыі Герхард Карнер наведалі ў нядзелю, 27 красавіка, сталіцу Сірыі Дамаск. Паводле інфармацыі нямецкага міністэрства, падчас перамоваў з міністрам унутраных справаў новага сірыйскага ўраду Анасам Хасанам Хатабам абмяркоўваліся, у тым ліку, «перспектывы вяртання сірыйскіх бежанцаў у выпадку стабілізацыі і мірнага развіцця Сірыі», паведамляе «Нямецкая хваля».

Як падкрэслівае агенцтва KNA, Нямеччына і Аўстрыя асабліва зацікаўленыя ў тым, каб асабліва небяспечныя злачынцы і ісламісцкія экстрэмісты з сірыйскім грамадзянствам былі як мага хутчэй вернутыя ў сваю краіну. «Гэта павінна быць зроблена, як толькі дазволіць сітуацыя ў Сірыі», – заявіла Нэнсі Фэзэр, якая ў найбліжэйшы час сыходзіць з пасады федэральнай міністаркі ўнутраных справаў.

В.а. кіраўніка МУС ФРГ адзначыла таксама імкненне часткі сірыйцаў пабудаваць кар'еру ў Нямеччыне. «Многія з іх знайшлі працу ў Нямеччыне, вывучылі нямецкую мову і пабудавалі новае жыццё – вядома, яны павінны мець магчымасць застацца. Іншыя вернуцца на радзіму, калі надзея на мір стане рэальнасцю. Пры гэтым у першую чаргу неабходна спрыяць добраахвотнаму вяртанню», – сказала Фэзэр, падкрэсліўшы, што ў ФРГ «значна ўзмацнілі жорсткасць законаў у гэтай галіне».

Паводле звестак нямецкага цэнтральнага рэгістра іншаземцаў, на канец сакавіка 2025 года ў Нямеччыне жыло 968.899 грамадзянаў Сірыі, прынятых ФРГ у асноўным пасля 2015 года, з якіх толькі 1080 былі абавязаныя пакінуць краіну без права на падаўжэнне віду на жыхарства. Блізу 163 тысячаў з іх атрымалі грамадзянства, вынікае са статыстыкі.

Раней МУС ФРГ паведаміла, што з моманту падзення рэжыму клану Асадаў у снежні 2024 года добраахвотна вярнуліся на радзіму ўсяго 464 сірыйцы – пры фінансавай падтрымцы федэральнай установы ў справах міграцыі і бежанцаў. «З усяго відаць, Фэзэр зацікаўленая не толькі ў вяртанні ісламістаў і асабліва небяспечных злачынцаў», – выказала меркаванне агенцтва KNA.

Як адзначаецца, Фэзэр і Карнер яшчэ 26 сакавіка правялі перамовы з урадам Іярданіі, Управай вярхоўнага камісара ААН у справах бежанцаў (UNHCR) і экспертамі ў пытаннях бяспекі і міграцыі ў рэгіёне. Аднак паездка ў Сірыю, якая планавалася на тыя ж дні, была скасаваная праз папярэджанні аб пагрозе тэрактаў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com