Трамп пачаў глабальную гандлёвую вайну: свет адрэагаваў

Першыя наступствы ў свеце і эканоміцы ЗША.

Абвешчаныя прэзідэнтам ЗША Дональдам Трампам тарыфы для гандлёвых партнёраў Штатаў ва ўсім свеце вагаюцца ад 10% да 49% на імпартныя тавары. Самыя высокія амерыканскія тарыфы за стагоддзе выклікалі неспакой і разгубленасць сусветных лідараў.

З якімі менавіта мытамі сутыкнуцца краіны, як рэагуюць у свеце і ці ўзмоцніцца «гандлёвая вайна», гаворыцца ў матэрыяле РБК-Украіна.

Падчас выступу ў Вашынгтоне каля Белага дома Трамп абвясціў, што прыменіць не менш за 10% мыты для ўсіх экспарцёраў у ЗША, і яшчэ большыя мыты для прыкладна 60 краін, каб супрацьстаяць вялікім гандлёвым дысбалансам са Штатамі.

У такі пералік уваходзяць некаторыя з найбуйнейшых гандлёвых партнёраў ЗША, такія як Еўрапейскі Звяз, Японія, В'етнам, а таксама Кітай. Апошні зараз сутыкаецца з мытай, якая перавышае 50%.

Акрамя таго, Трамп абвясціў надзвычайнае становішча ў ЗША ў сувязі з памерам гандлёвага дэфіцыту, што дазваляе яму выкарыстоўваць спецыяльныя паўнамоцтвы для ўстанаўлення тарыфаў.

Таксама прэзідэнт ЗША абвясціў аб увядзенні 25% мыты для ўсіх замежных аўтавытворцаў.

Адзначым, у дачыненні да Украіны ўводзяць асобны тарыф на імпарт сумай 10%.

Новыя ўзаемныя тарыфы набудуць моц з 9 красавіка. Між тым мінімальны базавы тарыф усе краіны пачнуць плаціць з 5 красавіка.

Усяго ў абнародаваным Белым домам пераліку, да якіх будуць прымяняцца новыя мыты, пазначаныя 183 краіны і Еўрапейскі Звяз. Ніжэй прыведзены некаторыя з іх, і дадамо агульны спіс у фота-табліцы.

Камбоджа - 49%

В'етнам - 46%

Шры-Ланка - 44%

Тайланд - 36%

Кітай - 34%

Бангладэш - 34%

Тайвань – 32%

Інданезія - 32%

Швайцарыя - 31%

Паўднёвая Афрыка - 30%

Пакістан - 29%

Паўднёвая Карэя - 25%

Японія - 24%

Малайзія - 24%

ЕЗ - 20%

Ізраіль - 17%

Філіпіны - 17%

Вялікабрытанія - 10%

Бразілія - 10%

Сінгапур - 10%

Чылі - 10%

Украіна - 10%.

Якія выключэнні

Варта адзначыць, што пакуль новыя тарыфныя меры не тычацца Канады і Мексікі, якія залучаны ў асобную спрэчку аб тарыфах з ЗША.

Акрамя таго, ЗША не будуць прымяняць новыя мыты на некаторую прадукцыю: сярод іх аўтамабілі, асобныя вырабы са сталі/алюмінію і аўта/аўтазапчасткі, паўправаднікі, піламатэрыялы, зліткі, медзь, фармацэўтычныя прэпараты, энэргія і іншыя пэўныя карысныя выкапні, якія недаступныя ў ЗША.

Дададзім, што ўзаемныя мыты з боку ЗША не распаўсюджваюцца на Беларусь, Кубу, Расею і КНДР.

Тарыфы для краін Азіі

Міністр фінансаў ЗША Скот Бесэнт ужо пацвердзіў, што для Кітая будзе тарыф на 54% (34% абвешчаныя дадаюцца да ўжо існуючых 20%, якія Трамп ужо ўвёў у гэтым годзе ў сувязі з гандлем фентанілам).

Гэта азначае, што шмат кітайскага імпарту сутыкаюцца з тарыфамі, якія перавышаюць 50 адсоткаў. Паводле ацэнак Bloomberg Economics, яны дастаткова высокія, каб знішчыць большую частку гандлю паміж ЗША і Кітаем да канца гэтага дзесяцігоддзя.

Трамп таксама абвясціў, што спыніць бязмытную дастаўку невялікіх пасылак з Кітая па так званым выключэнні de minimis.

Што да блізкіх амерыканскіх партнёраў у Азіі, то для Японіі і Паўднёвай Карэі ўводзяцца ўзаемныя стаўкі ў сярэднім на 20%, гэта значыць амаль удвая больш, чым для В'етнама.

ЗША заклікаюць краіны не прымаць контрмеры

Заходнія аглядальнікі назвалі такі крок з боку амерыканскага лідара "драматычнай эскалацыяй гандлёвай вайны Трампа". Як піша Bloomberg, гэта, магчыма, пацягне за сабой неадкладны адказ з боку іншых краін.

Пры гэтым кіраўнік Мінфіна ЗША Скот Бесэнт пасля выступу Трампа заклікаў іншыя краіны не выкарыстоўваць контрмеры, параіў «не помсціць», і намякнуў, што мыты могуць быць павялічаныя.

Тут варта адзначыць, што прэзідэнт ЗША дапусціў магчымасць зніжэння тарыфных ставак, калі гандлёвыя партнёры прымуць меры, якія будуць садзейнічаць амерыканскаму экспарту. Трамп заклікаў замежных лідараў "скасаваць уласныя тарыфы, зняць бар'еры" і "не маніпуляваць сваімі валютамі".

Рэакцыя ў свеце і ў эканоміцы

Еўрапейскі звяз, які рыхтуе надзвычайныя меры ў адказ для абароны сваёй эканомікі, падпадае пад 20% мыту. Заходнія СМІ пісалі, што кіраўніца Еўрапейскай камісіі Уршуля фон дэр Ляен раніцай павінна выступіць з заявай аб новых тарыфах ЗША.

Бізнэс-сакратар Вялікабрытаніі Джонатан Рэйнальдс сказаў Associated Press, што "ЗША з'яўляюцца нашым найбліжэйшым супольнікам, таму наш падыход у тым, каб захоўваць спакой і адданасць". Чыноўнік дадаў, што Лондан працуе над укладаннем гандлёвага пагаднення з мэтай "змякчыць уплыў" новых амерыканскіх мыт.

Прэм'ер-міністр Аўстраліі Энтані Албанэзэ запэўніў, што краіна не плануе "ўдзельнічаць у гонцы... якая вядзе да павышэння цэн і запаволення росту".

Прэзідэнт Швайцарскай федэрацыі Карын Келер-Сутэр напісала на сваёй старонцы ў сацсетцы, што краіна "хутка вызначыць наступныя крокі".

Міністр гандлю і прамысловасці Нарвэгіі Сесілі Мірсет заявіла дзяржаўнаму вяшчальніку NRK, што краіна зробіць разлікі і "атрымае агульнае ўяўленне аб тым, што гэта напраўду азначае для Нарвэгіі".

Прэм'ер-міністр Швэцыі Ульф Крыстэрсан заявіў, што краіна "будзе працягваць выступаць за свабодны гандаль і міжнароднае супрацоўніцтва".

Віцэ-прэм'ер-міністр і міністр гандлю Ірландыі Сайман Харыс адзначыў, што такая пастанова з боку ЗША па 20% мыце для ЕЗ "выклікае шкадаванне".

Міністр гандлю Новай Зеландыі Тод Маклей заявіў, што краіна не збіраецца адказваць Штатам контрмытамі, бо гэта "падвысіць кошты для спажыўцоў у Новай Зеландыі, і гэта прывядзе да інфляцыі".

У Міністэрстве гандлю Кітая ўжо паабяцалі прыняць контрмеры, але не ўдакладнілі, якія крокі можа зрабіць Пекін. Ён заклікаў Штаты "неадкладна скасаваць свае аднабаковыя тарыфныя меры і належным чынам развязаць свае супярэчнасці0 са сваімі гандлёвымі партнёрамі шляхам дыялогу на роўных".

Прэм'ер-міністр В'етнама Фам Мінь Чынь правёў тэрміновае пасяджэнне кабінета міністраў праз некалькі гадзін пасля таго, як адміністрацыя Трампа абвясціла аб тарыфе для краіны на 46 адсоткаў. Газета Tien Phong са спасылкай на афіцыйнага прадстаўніка міністэрства піша, што кіраўнікі міністэрства гандлю прадставяць справаздачу аб уплыве мыт на экспарт В'етнама і перспектывах яго эканамічнага росту.

Падчас першых таргоў пасля абвяшчэння Трампа ф'ючарсы на акцыі ЗША ўпалі больш чым на 3%, а нафта патаннела. Кітайскія акцыі ўпалі, як і курс юаня, а асноўны паказчык мацерыковай біржы акцый, якія каціруюцца ў Ганконгу, пачаўся на 2,6% ніжэй, перш чым кампенсаваць частку страт.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com