ЗША ўскалыхнулі масавыя акцыі пратэсту супраць Трампа і Маска

У сталіцах штатаў і буйных гарадах прайшлі больш за 1400 акцый.

У суботу, 5 красавіка, у ЗША прайшлі больш за 1400 акцый пратэсту супраць палітыкі прэзідэнта Дональда Трампа і ягонага паплечніка Ілана Маска. Арганізатары называюць іх дзеянні «варожым захопам улады» і атакай на фундаментальныя правы і свабоды амерыканцаў, паведамляе CNN.

Акцыі пратэсту пад лозунгам Hands Off! («Рукі прэч!») былі арганізаваныя кааліцыяй грамадскіх рухаў у супрацоўніцтве з праваабарончымі арганізацыямі, прафзвязамі ды іншымі ініцыятывамі.

Пратэсты прайшлі ў сталіцах штатаў, ля будынкаў федэральных органаў, у парках і на вуліцах гарадоў. Некаторыя акцыі таксама адбыліся па-за межамі ЗША. Паводле звестак арганізатараў, удзел у іх узялі блізу 600 тысячаў чалавек.

Сярод асноўных патрабаванняў пратэстоўцаў – спыніць узмацненне ўплыву буйных бізнэсмэнаў і карупцыю ва ўрадзе ЗША, не дапускаць скарачэння фінансавання сацыяльных праграмаў, а таксама спыніць дыскрымінацыю ў дачыненні да мігрантаў, трансгендараў і іншых уразлівых групаў.

Падчас мітынгу ў Вашынгтоне выступілі некалькі прадстаўнікоў Кангрэса, у тым ліку Джэймі Раскін і Максвэл Фрост – яны выказалі занепакоенасць узмацненнем аўтарытарных тэндэнцый і скарачэннем сацыяльных праграмаў. Паводле іх словаў, адміністрацыя Трампа праводзіць палітыку, накіраваную на паслабленне правоў працоўных, абмежаванне свабоды слова і скарачэнне дзяржаўнага сектару.

– Нам кажуць, што мігранты адбіраюць нашыя працоўныя месцы, але насамрэч менавіта гэтыя людзі (прадстаўнікі ўлады ў ЗША. – Заўв. рэд.) вывозяць бізнэс за мяжу і наймаюць юрыстаў для разгрому прафзвязаў. Нам кажуць, што транс-персоны – пагроза дзецям, а самі яны зачыняюць школы, адмаўляюць кліматычны крызіс і ігнаруюць эпідэмію гвалту з ужываннем зброі, – заявіў Фрост, назваўшы тое, што адбываецца, «уздымам аўтарытарызму на стэроідах».

Крытыку зазналі і дзеянні Ілана Маска, які ўзначаліў новы Дэпартамент эфектыўнасці ўраду (DOGE). Так, Маск заяўляў пра значнае скарачэнне дзяржаўных выдаткаў, у тым ліку закрыццё USAID і звальненне тысячаў дзяржслужбоўцаў. Таксама ў рамках «аптымізацыі» была рэарганізаваная Адміністрацыя сацыяльнага забеспячэння, што прывяло да збояў у яе працы.

Пратэстоўцы нагадалі, што адміністрацыя Трампа ўзмацніла жорсткасць міграцыйнага кантролю, уключаючы планы масавых дэпартацый, што ўжо выклікала праблемы – у адным выпадку была памылкова выслана сям'я з Сальвадора.

На пратэстах таксама выступілі лідары прафзвязаў дзяржслужбоўцаў. Яны заявілі, што дзеянні ўраду ЗША – самая сур'ёзная атака на калектыўныя працоўныя правы за апошнія дзесяцігоддзі. У адказ прафзвязы падалі пазоў у суд з патрабаваннем спыніць абмежаванні, якія ўводзяцца адміністрацыяй Трампа.

З пачатку другога тэрміну Трампа, паводле звестак CNN, было звольнена больш за 120 тысячаў супрацоўнікаў федэральных установаў. Пратэстоўцы выказваюць занепакоенасць тым, што такія захады падрываюць стабільнасць дзяржаўных інстытутаў і ставяць пад пагрозу сацыяльныя гарантыі для мільёнаў грамадзянаў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com