Арыштаванага расейскага генерала Папова скіруюць на вайну ва Украіне

Ён узначаліць атрад «Шторм Z».

Былы камандзір 58-й гвардзейскай арміі УС РФ генерал-маёр Іван Папоў, арыштаваны паводле абвінавачвання ў махлярстве, накіруецца на вайну супраць Украіны. У сераду, 9 красавіка, ягоны адвакат Сяргей Буйноўскі паведаміў, што ягоны падабаронны звярнуўся з такім хадайніцтвам, папрасіўшы Тамбоўскі гарнізонны вайсковы суд прыпыніць вытворчасць у ягонай справе.

Як паведамляе ТАСС са спасылкай на Буйноўскага, абвінавачанне папрасіла прысудзіць генералу да шасці гадоў калоніі агульнага рэжыму, а таксама пазбавіць яго звання генерал-маёра і прызначыць штраф памерам 800 тысячаў рублёў.

Між тым «Коммерсант» са спасылкай на крыніцу ў сілавых структурах паведамляе, што Папоў узначаліць адзін з атрадаў «Шторм Z», якія фармуюцца з падследных і зняволеных. Раней Папоў звярнуўся з адкрытым лістом да дыктатара РФ Уладзіміра Пуціна з просьбай вярнуць яго на фронт ва Украіне.

Генерал-маёр Іван Папоў быў арыштаваны ў сярэдзіне траўня 2024 года паводле абвінавачання ў махлярстве, здзейсненым арганізаванай групай альбо ў асабліва буйным памеры. Паводле версіі следства, ён датычны да крадзяжу ў 2023 годзе больш як 1,7 тысячы тонаў вырабаў металапракату памерам больш як 130 млн рублёў, прызначаных для абсталявання інжынерных абарончых збудаванняў на лініі баявога судотыку ў Запарожскай вобласці. У пачатку ліпеня Папову прад'явілі канчатковае абвінавачанне, да якога дадалі абвінавачанне ў службовай падробцы.

Пасля пачатку вайны Расеі супраць Украіны Папоў быў прызначаны камандзірам 58-й агульнавайсковай арміі, якая адказвала за Запарожскі кірунак. У ліпені 2023 года дэпутат Дзярждумы Андрэй Гурулёў апублікаваў аўдыязварот генерала да вайскоўцаў, у якім той гаварыў пра «складаную сітуацыю са старэйшым кіраўніцтвам».

У ліку іншага Папоў расказаў, што даклаў кіраўніцтву пра адсутнасць сродкаў контрбатарэйнай барацьбы і станцый артылерыйскай выведкі, а таксама пра «масавую гібель і калецтвы» салдатаў, пасля чаго быў адхілены ад пасады «за адзін дзень».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com